Փաստ ինֆո

«Մենք երբեք չենք հաշտվի այն եռակողմ համաձայնագրի հետ, որ ձևակերպված է որպես հայտարարություն, բայց դա աշխատում է դե ֆակտո և չենք կարող փոխել և հրաժարվել դրանից»,- ասաց վարչապետի միասնական թեկնածու Վազգեն Մանուկյանը՝ Ազատության հրապարակում հրավիրված հանրահավաքին ներկայացնելով նոր կառավարության առաջնահերթ գործողությունները և հակաճգնաժամային քայլերը։

Ըստ Վազգեն Մանուկյանի՝ դա կնշանակի պատերազմ Ադրբեջանի և Թուրքիայի հետ, կնշանակի նաև խռովություն ՌԴ խաղաղապահ զորքերի հետ։
«Հիմա Նիկոլի շնորհիվ այդպիսի վիճակ չունենք, նույնիսկ Սոթքը չենք կարողնում պահել։ Այդ պայմանագիրը բացթողումներ ունի և այնտեղ տասնյակ էջեր պետք է լինեին։ Նոր կառավարությունը պետք է կարողանա բանակցությունների միջոցով ամեն մի անորոշությունը ի օգուտ Հայաստանի դարձնել»։

Վազգեն Մանուկյանը նշեց,որ թվարկվող բոլոր խնդիրները պետք է լուծվեն զուգահեռ։ Երկրորդ հարցը՝ անվտանգությանն է վերաբերում։
«Նորից պետք է վերականգնել բանակը, բանակի մարտունակությունը, դարձնել ժամանակակից բանակ։ Անվտանգության մեջ մտնում է նաև հատուկ հարաբերությունները ՌԴ-ի հետ»։

Վազգեն Մանուկյանը նշեց, որ այս տարածաշրջանում եթե կապված չես Ռուսաստանի հետ՝ մնում է Թուրքիան։ ՌԴ-ի հետ ունենք ընդհանուր շահեր, Թուրքիայի հետ չունենք ոչ մի շահ։ ՌԴ-ից բացի ունենք բազմաթիվ դաշնակիցներ, որոնց հետ պետք է վերականգնենք հարաբերությունները։

«Եթե ստեղծվում է դաշինք Թուրքիայի դեմ, մենք այդ դաշինքի մեջ ենք։ Նաև պետք է նորից մտնենք բանակցային պրոցեսի մեջ»։

Երրորդ հարցը՝ ամենակարևորն է և վերաբերում է անհետ կորածների, գերիների, վիրավորների, զոհված ազատամարտիկների հարցին։

«Ամենակարևոր հարցերից մեկն էլ մեր անհետ կորած զինվորների, գերիների, զոհված զինվորների ընտանիքներին օգնելու խնդիրն է։ Կարևոր է նաև Հայաստանի մթնոլորտի առողջացումը։ Հայաստանում աշխատում են արտաքին ուժեր, որոնք դիտավորյալ պառակտում են մեր ժողովրդին։ Պետք է մաքրել այդ դաշտը, և մեր առջև ինչքան մեծ խնդիրներ դնենք, այնքան ավելի միասնական կլինենք։ Գլխավոր խոչընդոտներից մեկը, որը թույլ չի տալիս մեր ժողովրդին առաջ գնալ, դա Նիկոլ Փաշինյանն է։ Նա  պետք է հեռանա, թող հեռանա կամավոր, թե չէ կհեռանա զոռով», - հայտարարեց Վազգեն Մանուկյանը։

Եթե շարժումը չհաղթի, գազազած ժողովուրդն իրեն կհոշոտի։ «Այս շարժումն այն ճանապարհն է, որ իրեն հնարավորություն է տալիս քաղաքակիրթ ձևով փոխել իրավիճակը Հայաստանում։ Ձախողվեց, ավելի վատ է լինելու, բայց ինքը բոլոր դեպքերում գնալու է»,- հայտարարեց Մանուկյանը։

Վազգեն Մանուկյանը ասաց, որ մեր առջև ինչքան մեծ խնդիրներ դնենք, ավելի միասնական պիտի լինենք։

«Ամեն պարտությունից սկսվում է հաջորդ հաղթանակը։ Կարճ ժամաանակում մենք պետք է նորից ոտքի կանգնենք, նորից ինքնավստահություն ձեռք բերենք, հավատանք մեր ուժերին, գնանք առաջ,- եզրափակեց գործիչը։

Աղբյուր` Փաստինֆո