Փաստ ինֆո

Վերջին օրերին ինձ հաճախ են հարցնում, թե ինչու չեմ ստեղծում բարեգործական հիմնադրամ և պաշտոնապես զբաղվում դրամահավաքով՝ վիրավորների և փախստականների համար։ Այս մասին ֆեյսբուքյան իր էջում գրել է հայտնի բլոգեր Ալեքսանդր Լապշինը։

«Պատասխանը շատ պարզ է՝ ես լրագրող եմ և բլոգեր։ Ես պատրաստ չեմ ինձ վրա բարոյական և ֆինանսական պատասխանատվություն վերցնել հավաքված մեծ գումարների համար, որոնք փոխանցվել են մարդկանց կողմից, ես չեմ ցանկանում զբաղվել հաշվապահությամբ, իրավական խորհրդատվությամբ, բացատրել և արդարանալ, թե ինչու է գումարը ծախսվել այսպես, ոչ թե՝ այնպես։ Դա լրագրողի աշխատանք չէ, համաձայնեք։

Մարդիկ, որոնք վստահում են անձամբ ինձ և ցանկանում են աջակցել իմ գործունեությանը՝ շնորհակալ եմ։ Բայց յուրաքանչյուրը պետք է զբաղվի իր գործով։ Ինչ վերաբերում է հիմնադրամներին, ապա կարող եմ մատների վրա հաշվել հիմնադրամները՝ կապված Հայաստանի հետ, որոնք անկեղծորեն օգնում են մարդկանց և առաջին հերթին դա Շարլ Ազնավուրի հիմնադրամն է։ Կան նաև մեկ-երկու հիմնադրամներ, որոնց կարող ենք վստահել։

Թե ինչով են զբաղվում մոտ 100 հիմնադրամներ (այո, հենց 100՝ հաշվի առնելով գրանցամատյանը), որոնք հավաքում են ինչ-որ գումարներ՝ չգիտեմ։ Վերջիններս չեն ներկայացնում որևէ զեկույց, պարզ չէ, թե ինչ են անում, գումարների ծախսման թափանցիկ սխեմա չկա, այնտեղ ինչ-որ վիթխարի «ներկայացուցչական» ծախսեր են, որոնք կազմում են ամբողջ հավաքված գումարի մոտ 30 տոկոսը։ Կան նաև այնպիսիք, որ փաստաթղթերով, իբրև թե վարձակալում են գրասենյակներ, սակայն փաստացի այդ հասցեներում գտնվում են բոլորովին այլ կազմակերպություններ կամ խանութներ։

Հիշում եմ՝ մեկ տարի առաջ հարցրեցի՝ ինչու հիմնադրամներից մեկը բուժման նպատակով արտերկիր է ուղարկել կոնկրետ երեխայի, այլ ոչ թե մեկ ուրիշին։ Ուղղակի հարց, որի վերաբերյալ նորմալ մարդկանց մոտ հաջորդում է կոռեկտ հարց՝ հիմնված այդ հիմնադրամի չափանիշների վրա։ Օրինակ՝ երեխայի վիճակը շատ ծանր էր կամ կոնկրետ այդ երեխայի համար գումար է փոխանցվել ֆոնդին։ Խնդիր չկա։

Բայց դրա փոխարեն իմ հասցեին սպառնալիքներ են հնչել, չգիտես ինչու, հիշատակվել են Հայաստանում ազդեցիկ մարդկանց անուններ և հիշում եմ, որ նույնիսկ ինչ-որ չինովնիկ էր գրել, թե մի խառնվիր այնտեղ, որտեղ պետք չէ, իբրև այդ հիմնադրամով զբաղվող կինը իր հովանու ներքո է։ Այդ համեստ մարդը՝ մոտ 500 հազար դրամ ամսական աշխատավարձով շրջում էր ավտոմեքենայով, որի համար գումար պետք է հավաքեր 20 տարի։ Այդ ամենից պարզ դարձավ, թե որքան պղտոր են այդ սխեմաները, երբեմն էլ՝ քրեական։

Ոսւտի, ընկերներ, մենք օգնում ենք մարդկանց մեր համամարդկային մակարդակով և ներառում ենք ոչ միայն դոնորների գումարները, այլև՝ մեր սեփականը։ Փրկել ամբողջ աշխարհը՝ չենք կարող։ Բայց և ուրիշինը չենք գողանում»,- գրել է Լապշինը։

Աղբյուր` Փաստինֆո