Փաստ ինֆո

Ցանկացած փորձ հեղինակազրկելու այս կառույցը և ներքաշելու ներքաղաքական շահարկումների մեջ, հարված է ՀՀ պետականությանը։ Այս մասին այսօր լրագրողների հետ զրույցում ասաց ՀՀ արտաքին գործերի նախարար Արա Այվազյանը։

Վերջինս, լրագրողների հետ զրույցի ժամանակ, հանդես եկավ հայտարարությամբ.
«Հայաստանի արտաքին քաղաքական գերատեսչությունը մեր ինքնիշխանության և պետականության հիմնասյուներից է։ Լինելով ապաքաղաքական կառույց՝ ունի մեկ հավերժական նպատակ՝ ամենօրյա աշխատանքով պաշտպանել ՀՀ-ին և ՀՀ շահերը։ Ցանկացած փորձ հեղինակազրկելու այս կառույցը և ներքաշելու ներքաղաքական շահարկումների մեջ, հարված է ՀՀ պետականությանը, հատկապես այս օրերին, երբ ռազմական գործողությունների ավարտից հետո ողջ ծանրությունը և պատասխանատվությունը հետզհետե տեղափոխվում է դիվանագիտություն։ Վստահ ենք, որ այս գիտակցումը կիսում են երկրի և ժողովրդի ճակատագրով մտահոգ մեր բոլոր քաղաքացիները և հայրենակիցները»,-նշեց Արա Այվազյանը։

Նախարարն ընդգծեց, որ խոնարհվում են մեր ազգային բանակի առջև, որը հերոսաբար դիմակայեց Արցախի և հայ ժողովրդի դեմ Ադրբեջան-Թուրքիա միջազգային ահաբեկչություն եռյակի կողմից սանձազերծված ագրեսիային ու տապալեց ցեղասպան դաշինքի հայ ժողովրդի պատմական հայրենիքում հայ ժողովրդին ոչնչացնելու նկրտումները. «Պետք է փաստենք, որ այն իրավիճակը, որն այսօր ունենք պայմանավորված է նրանով, որ մենք դիմակայել ենք անհամաչափ ուժերի։ Ինչպես մեր զինվորները, քույրերն ու եղբայրներն Արցախում, հայ դիվանագիտությունը եղել և շարունակում է մնալ հայրենիքի պաշտպանության առաջատար դիրքերում»,-ասաց Արա Այվազյանը։

ԱԳ նախարարն արձանագրեց, որ այժմ ունենք հրատապ հասցեագրում պահանջող խնդիրներ, և հայ դիվանագիտությունն այդ հրատապ հարցերի լիարժեք ու համապարփակ լուծման ուղղությամբ մեծածավալ աշխատանք պետք է անի.«Պատմությունն ունի օրինակներ, երբ դիվանագիտությունը երկիրը դուրս է բերել ամենածանր իրավիճակներից։

Խնդրում եմ հավատալ և վստահել հայ դիվանագիտությանը»,-նշեց Արա Այվազյանը։

Հարցին՝ արդյոք սրբագրում է իր այն հայտարարությունը, որ դիվանագիտական պարտություն չի եղել, ռազմադաշտում է պարտություն եղել, նախարարը չպատասխանեց հարցին և խնդրեց չաղավաղել իր խոսքերը և ամբողջությամբ ներկայացնել իր հայտարարությունը։

ԱԳ նախարարը չպատասխանեց լրագրողների հարցերին՝ ասելով. «Բոլոր հարցերին պատասխան կտրվի աշխատանքի միջոցով»։

Աղբյուր` Փաստինֆո