Փաստ ինֆո

Ընդդիմության միասնական թեկնածուի անվան հստակեցումից հետո հանրության այն շերտը, որ ներկա՝ պարտված, ապաշնորհ և բոլոր ոլորտներում տապալվածից և նրա կամակատարներից ձերբազատվելու այս ճակատագրական պահին դեռ շարունակում է «նախկիններ, թալան» հանգով տեքստեր արտաբերել՝ որպես անվստահության նշան և կամ էքստրեմալ այս իրավիճակում նոփ-նոր երկնքից իջած վարչապետի պահանջ դնել, ուղղակի իրատեսությունից զուրկ են և չնչին իսկ չեն պատկերացնում, թե ինչ ջանքեր պիտի գործադրի եկող վարչապետը՝ փաշինյանական «ավգյան ախոռները» մաքրելու, պետությունը հունավորելու համար: Այն դեպքում, երբ ազգովի հետպատերազմական ապատիայի մեջ ենք՝ լուծման կարոտ բարդագույն խնդիրներով: Ի հավելումն, մինչ պատերազմը՝ երկուսուկես տարի կառավարման համակարգը ազատ անկման մեջ է եղել:

Եթե Վազգեն Մանուկյանն իր քաղաքական գործունեության, պետական կառավարման բոլոր և հատկապես՝ պաշտպանության և անվտանգային ոլորտների իր փորձառությամբ, հանրային սեկտորը համախմբելու կարողականությամբ հանձնառություն և պատասխանատվություն է ստանձնել բոլոր բնագծերում կորուստներ արձանագրած, փսորված մեր պետությունը՝ փրկության կառավարության ձևավորմամբ, կարող և ազգային ուժերով պատկերավոր ասած՝ «շողուլի» բերելու և ազգային ընթացք ապահովելու, ուրեմն, պիտի ողջունել միայն և աջակցել:

Քանզի պետությունից և պետականությունից անդին՝ այլ առաջնահերթություն մենք այսօր չունենք: Մնացյալը՝ պետության բաղադրիչներն են:

Հեղինակ՝ Ա.Ե.

Աղբյուր` Փաստինֆո