Փաստ ինֆո

19 տարեկան ժամկետային զինծառայող, հոկտեմբերյանցի Խաչիկ Հովսեփյանը ծառայության 9-րդ ամսում պատերազմ տեսավ, իսկ հոկտեմբերի 16-ին՝ Մարտակերտի շրջանում, ծանր վիրավորվեց։ Թշնամուն թիրախավորելուց հետո՝ 3 մետր հեռավորության վրա պայթել էր թշնամու արկը՝ զինվորը հրաշքով է փրկվել։ Ասում է՝ ֆիլմի պես արագ ամեն ինչ կատարվեց։

Խաչիկը երկու ոտքը վիրավոր, աչքերին բեկորներ, ականջները վնասված՝ տեղափոխվեց Մարտակերտի հիվանդանոց, հետո Ստեփանակերտ, ապա՝ Երևան։ Վիրավորվելու պահին, ինչպես «Փաստինֆո»-ի հետ զրույցում պատմեց քաջարի զինվորը, վախ չի զգացել։

Պատերազմի ժամանակ էլ՝ 19-ամյա Խաչիկը վստահ է եղել, որ հաղթելու ենք, ոգևորության ու զենքի պակաս չի զգացել, կարծում է՝ կազմակերպվածության խնդիր կար։ Իսկ հիմա որոշել է ուսումը Ճարտարապետական համալսարանում կիսատ թողնել. ծրագրավորող է ուզում դառնալ՝ ճիշտ հորաքրոջ նման։ Ասում է՝ պահանջված մասնագիտություն է, մանկուց իրեն ծրագրավորողի դերում է պատկերացրել։

Խաչիկի մոտ ոսկորների բազմաբեկոր վնասվածքից բացի, վնասվել էր նյարդն ու անոթները։ «Շենգավիթ» ԲԿ-ում մի քանի վիրահատության է ենթարկվել, հետո էլ հեռացվեց աչքերի օտար մարմինը, վերականգնվեց տեսողությունը։

Մանրամասները՝ տեսանյութում

Հ.Գ. Տեսանյութում թյուրիմացաբար սխալ է նշվել ժամկետային զինծառայողի ազգանունը, որի համար հայցում ենք քաջարի զինվորի ու նրա ընտանիքի ներողամտությունը։

Աղբյուր` Փաստինֆո