Փաստ ինֆո

«Անհայտ կորածների որոնողական աշխատանքների ընթացքում երբեմն գտնվում և դուրս են բերվում մարդկանց աճյուններ։ Անհայտ կորածն այն կատեգորիան է, որը ոչ ողջ է, ոչ մահացած, այլ մարդ է, որի մասին տեղեկություն չկա»,- այս մասին «Փաստինֆո»-ի հետ զրույցում ասաց Կարմիր Խաչի միջազգային կոմիտեի հայաստանյան գրասենյակի հաղորդակցման ծրագրերի ղեկավար Զառա Ամատունին՝ անդրադառնալով անհետ կորածների որոնողական աշխատանքներին։ 

Ցավոք, երբեմն անհայտ կորածի ճակատագրի պարզաբանումը հանգեցնում է այլ արդյունքի՝ մահացած մարդու ինքնությունը ճանաչելուն և երկար ժամանակ է պահանջվում նույնականացման համար։ ԴՆԹ –ի միջոցով փորձում են ճանաչել անձի ինքնությունը։

«Ամենօրյա իրականացվող որոնողական աշխատանքներում տեսնում ենք, ինչպես են թիմերն աշխատում և դուրս բերում մարմիններ, նույնականացվում են կամ միանգամից ճանաչվում են ընտանիքի կողմից»։

Հոկտեմբերից ԿԽՄԿ այցելում է քաղաքացիական անձանց և զինվորականների, որոնք անազատության մեջ են պահվում, իրավունք ունեն կապ պահել իրենց հարազատների հետ, սակայն նրանց վերադարձնելու որոշումը կայացնում են կողմերը։

«Մենք ունեցել ենք հնարավորություն այցելելու մի շարք մարդկանց և առ այսօր ունենում ենք նոր հաստատումներ իշխանությունների կողմից, որը թույլ է տալիս մեր պատվիրակներին տեսակցել անձանց, որոնց մասին մենք տեղեկությունները ստանում ենք և օգնել կապ հաստատել ընտանիքների հետ։ Մենք այդ մարդկանց մասին ստանում ենք տեղեկություններ տարբեր աղբյուրներից, որոնք ճշտելու և հաստատելու արդյունքում պարզում ենք պահման փաստը և վայրը։»։

Կարմիր Խաչի ներկայացուցիչները տեսակցել են՝ թե քաղաքացիական, թե զինվորական մի շարք անձանց։ Նույնը վերաբերում է նաև հայկական կողմում պահվող ադրբեջանցի գերիներին։ Իսկ բոլորը բոլորի դիմա՞ց, թե փուլային տարբերակով է տեղի ունենալու գերիների փոխանակումը, Ամատունին չնշեց.

«Կողմերի հնչեցվող մտադրությունները մենք ողջունում ենք։ Ինչ վերաբերում է կոնկրետ գործընթացներին կամ ինչպես են ընթանում վերադարձի առաջարկները կողմերի միջև, կոնֆիդենցիալ երկխոսության շրջանակների տիրույթում են և չենք կարող ընթացքի հետ կապված որևէ մեկնաբանություն տրամադրել»։

«Բոլորը բոլորի դիմաց» սկզբունքի մասին հայտարարել էր Ադրբեջանի նախագահը։ Բովանդակության մասով, թե ի՞նչ է դա նշանակում, ե՞րբ է տեղի ունենալու և ի՞նչ ձևաչափով, որոշելու են կողմերը, տեղեկությունը գտնվում է փակ դռների հետևում։

Անդրադառնալով Ադրբեջանում սպասվելիք շքերթին հայ ռազմագերիների մասնակցությունը կանխելուն՝ Ամատունին նշեց, որ ցանկացած հայտարարություն ու մտադրություն, որը կարող է որակվել որպես միջազգային մարդասիրական իրավունքի դրույթների խախտում՝ երկխոսության միջոցով քննարկվում է։

Աղբյուր` Փաստինֆո