Փաստ ինֆո

«Փաշինյանի այս պահվածքը նման է ոչ միայն 90-ականների իշխանությունների որդեգրած վարքագծին, այլ նաև բոլոր այն դիկտատուրական երկրներին, որոնք, չունենալով որևէ միավորում, ընդդիմախոսների նկատմամբ կիրառել են ամենաբիրտ, կոշտ ու կոպիտ ապօրինի գործողությունները: Այդ ցուցակում, փաստորեն, բացառություն չի նաև ներկայիս Հայաստանը՝ ազգադավ իշխանության և դրա ղեկավարի գլխավորությամբ» ,-ասում է ՀՅԴ անդամ Արծվիկ Մինասյանը , «Փաստինֆո»-ի հետ զրույցում վերլուծելով Հայաստանի Հանրապետության իշխանությունների, մասնավորապես՝ վարչապետի աթոռը զավթած անձի որդեգրած քաղաքականությունը՝ իր հրաժարականը պահանջող ընդդիմության նկատմամբ:

Հարցին՝ ինչո՞ւ խայտառակ կապիտուլյացիոն համաձայնագիր ստորագրած և Հայաստանի Հանրապետության վարչապետի աթոռը ապօրինի կերպով զավթած անձը ոչ մի կերպ չի ցանկանոմ թողնել իշխանության ղեկը, Արծվիկ Մինասյանը պատասխանում է՝ այդ մարդը չի ցանկանում հեռանալ մի պարզ պատճառով՝ նա աթոռապաշտ է և սոսնձվել է աթոռին, որովհետև բացի իր և իր մերձավոր շրջապատի բարեկեցությունից զատ, ուրիշ ոչինչ չի տեսնում.«Մեր խնդիրն է՝ իբրև ժողովուրդ, պարտադրել, որպեսզի նա պոկվի այդ սոսինձից և տեղը զիջի նոր իշխանություններին, որն, ի վիճակի կլինի այս ծանրագույն պահին դուրս բերել երկիրը խորը փոսից: Եվ, քանի որ նա աթոռապաշտ է ու հարստության նկատմամբ անհագ ցանկությունից աչքերը կուրացել, ականջները փակվել և միտքը բթացել է, հետևաբար, այս մարդը չի կարողանում լիարժեքորեն ընկալել, որ իր համար ամենաճիշտ տարբերակը մեր առաջարկած ուղին է՝ խաղաղ և անցնցում հեռանալը: Կարծում եմ, որ ինքը լավագույնս պետք է պատկերացնի իր ապագան՝ մերժելու դեպքում օրինական ճանապարհը, որը դժոխք տանող ուղին է: Անկախ մեր երկրի ներսում ցնցումները բացառելու ցանկությունից և մեզանից, ինքն է դեպի ցնցում առաջնորդում երկիրը, վերջնականապես բացելով դժոխքի դռները՝ ներքաշելով այնտեղ պետությունը, ողջ ժողովրդին ու հասարակության լայն շերտերը»:

Ի ՞նչ է, ի վերջո, սպասվում Փաշինյանին: Արծվիկ Մինասյանն այս պահին առավել իրական է համարում նրան պաշտոնանկ անելու և քրեական պատասխանատվության ենթարկելու ուղին: Փաշինյանը պետք է պատասխանատվության ենթարկվի և հանգիստ կրի իր պատիժը, ասում է Արծվիկ Մինասյանը և հավելում՝ դա կարող է լինել արդար դատարանի կողմից վճռած պատիժ՝ ընդհուպ մինչև ցմահ բանտարկություն:

Հարցին՝ ինչպե՞ս է վերջինս վերաբերում ընդդիմության կողմից այսօր հայտարարված միասնական թեկնածուին՝ Վազգեն Մանուկյանին և ի՞նչ է ակնկալում նրանից, Արծվիկ Մինասյանը պատասխանում է՝ որպես քաղաքական թիմի անդամ, ով կոնսենսուսով կողմ է արտահայտվել Վազգեն Մանուկյանի թեկնածությանը, հաշվի առնելով նրա անցած ճանապարհն ու կենսափորձը, ինչպես նաև՝ այս պահին պատմական առաքելություն իրականացնելու նրա պատասխանատվությունը, նաև՝ հրապարակայնորեն ստանձնած պարտավորությունը՝ ապագա խորհրդարանական ընտրություններում քաղաքական, կուսակցական շահ չհետապնդելը, Արծվիկ Մինասյանը համոզված է՝ դրական ելք ենք ունենալու .«Այսօր արված համատեղ հայտարարության մեջ ակնկալիքները շատ հստակ ներկայացված են: Կարծում եմ, դեկտեմբերի 5-ի հանրահավաքում, ժողովրդի լայն ներկայությամբ, Կամավորության առաջիկա անելիքների և առաջնայնությունների վերաբերյալ պարոն Մանուկյանն առավել մանրամասն կներկայացնի իր ծրագրերի մասին, որով էլ լիարժեք ընկալում կապահովվի նրա անձի և պլանների մասին»,- ասում է ՀՅԴ անդամ Արծվիկ Մինասյանը՝ «Փաստինֆո»-ի հետ զրույցում:

Հեղինակ՝ Նվարդ Մանվելյան

Աղբյուր` Փաստինֆո