Փաստ ինֆո

Արդեն մի քանի օր է՝ դերասաններ, ռեժիսորներ, երգիչ-երգրուհիներ և այլն, որոնք իրենց հասարակության մտավորական շերտի մեջ են պատկերացնում և տեղավորում, մի տեսակ անհանգստություն նշաններ են ցուցանում։ Որն արտահայտվում է հիմնականում հրապարակային հայտարարություններով։ Պարզվում է՝ վարչապետի պաշտոնը զբաղեցնող Նիկոլ Փաշինյանից խաբվածների մի հսկա բանակ է գոյացել որի անունն է «հայ մտավորականություն»։

Եվ չգիտես՝ այս խաբվածների բանակին կարեկցե՞ս, թե՞․․․

Գուցե անկեղծ են․․․ իսկ այդ դեպքում պիտի դադարես նրանց մտավորական համարել, որքան էլ որ իրենք իրենց այդ կաղապարի մեջ են տեղավորում։

Ասում են՝ խաբվեցինք, խոսքերին խաբվեցինք․․․ Նրանց կարելի է պատասխանել՝ չխաբվեի՛ք։ Գոնե՝ կեսից հասկանայիք։ Ո՞նց կարելի է մինչև վերջ խաբված մտավորական լինել։ Ըստ իս, դա աղանդավորն է։ Ի դեպ, բացատրական բառարաններում մտավորական՝ ասել է՝ մտավոր-մտածելու կարողությամբ օժտված, մտածող, իմացական, ինտելիգենտ, բանական մարդ, որն անհրաժեշտ գիտելիքներ ունի, առանձնանում է վերլուծելու և համադրելու, գնահատելու և անբոխային մտածողությամբ չառաջնորդվելու կարողությամբ։ Այլ ոչ թե՝ թիթեռի պես ամեն կրակի, անգամ՝ եթե այն դժոխքի կրակն է, նետվելու պատրաստ․․․

Ասում են՝ նախկիններից զզված էինք, նախկինները, կոռուպցիա, բան․․․ Անհեթեթությու՛ն, նախկինները մեղավոր չեն, որ դուք չեք կարողանում զանազանել գլխավորը, առաջնայինը՝ երկրորդականից։ Իսկ առաջնայինը քո պետությունն ու պետականությունն է, ոչ թե՝ ինչ-որ դրածո, որը կոռուպցիայի դեմ պայքարի անվան տակ կարող է գալ, իր սև գործն անել ու դեռ շարունակել, ու դեռ՝ չգնալ։ Մնալն էլ՝ գնալու պես՝ անհիշատակ, դավաճանի խարանով․․․ՈՒ հողդ, հայրենիքդ թշնամուդ նվիրելով, պետությունդ կործանելով, այնպես, որ այլևս ձեր արդարացում-կոռուպցիայի դեմ պայքարելն էլ չկարողանաք։

Ի դեպ, «Արդի հայերենի բացատրական բառարանը» «մտավորություն» բառի համար «Հնց-հնացած» նշումով մեկ այլ բացատրություն էլ տալիս է՝ «ուշիմություն», որի հոմանիշն է՝ նրբամտությունը, բանիմացությունը, քաջազգայությունը, խելացիությունը․․․և որից կամ այս բոլորից, պարզվում է իսպառ զուրկ են իրենց մտավորական համարող մեր շատ-շատերը։ Գուցե՝ ընդհանրապես՝ «մտավորություն» ունեցողներն ինքնին հնացա՞ծ են , իսկ մտավորական անվան տակ պատեհապաշտությունն է լավ տեղավորվել։ Չգիտեմ։

ՈՒ կարդում եմ նրանց մտքերը՝ ախր, ո՞վ կմտածեր, կպատկերացներ, որ Նիկոլը մեր մեջքի հետևում գործարքի մեջ կմտնի թուրքի և ադրբեջանցու հետ ու մեր որդիների արյամբ ազատագրված Արցախի հողը թշնամուն հանձնելու խայտառակ պայմանագիր կստորագրի։ Հինգ հազարից ավելի ջահել կյանքեր կզոհաբերի, հաշմանդամ կդարձնի մեր տղերքին, իսկ գերիների և անհայտ կորածների մասին էլ կմոռանա անգամ նշել։ Պարտություն կպարտադրի բոլորիս և այդքանից հետո անգամ՝ կհրաժարվի հրաժարական տալ․․․

Հիմա, հայ մտավորականությունն արթնացել է և Փաշինյանի հրաժարականն է պահանջում։ Այդ նույն մարդիկ, ի դեպ , մեկ օր կապիտուլյացիայից առաջ հրապարակավ ելույթ էին ունենում, թե՝ «Հաղթելու ենք», թեպետ 2․5 տարի՝ երկիրը սողացող պարտության մեջ էր։ Սև-սպիտակ, մերոնք-նրանք, հներ-նորեր․․․Բնականաբար, մեծ վտանգը՝ պատերազմն էլ անզոր էր լինելու, քանզի ամենամեծ վտանգը՝ երկրի ղեկին էր և պարտությունն արտահայտվում էր վարչապետի պաշտոնն զբաղեցրած անձի յուրաքանչյուր քայլի մեջ, իր «Հաղթելու ենք»՝ ստահոդ ելույթներում և պարտության տանող գործողություններում, «գերագույն գլխավորի»՝ իր հակասական հրամաններում և անհրաժեշտ հրամանների բացակայության մեջ։

․․․Անուններ չեմ տա, քանի որ իրենք իրենց անուններով են հիմա հանդես գալիս՝ ներում հայցում, ներողություն խնդրում՝ սխալվելու համար։

Կռապաշտությունն ահավոր է՝ գրող լինի, թե՝ գիտնական, ընդհուպ՝ ակադեմիական, կռապաշտությունը կործանարար է։ Աններելի։

Հեղինակ՝ Ա․Ե․

Աղբյուր` Փաստինֆո