Փաստ ինֆո

Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ, մեկնարկել է «Սասնա ծռեր 1» գործով դատական նիստը՝ տևական դադարից հետո։ Նշենք, որ դատաքննությունը գտնվում է ավարտական փուլում, մասնավորապես՝ ճառերի հրապարակման փուլում։ Մեղադրող և տուժող կողմն արդեն հրապարակել է մեղադրական ճառը՝ միջոնրդելով մեղավոր ճանաչել ամբաստանյալներին և դատապարտել ազատազրկման։ Թեև պաշտպանական կողմը պետք է հրապարակի արդեն մեղադրական ճառը, բայց գործով նոր պաշտպան է ներգրավվել, քանի որ Մանուկյանի և Բիլյանի պաշտպանական խմբի անդամ Դիանա Ղազարյանն ազատվել է աշխատանքից, ուստի՝ նոր պաշտպան ներգրավվեց հանրային պաշտպան Աննա Ծառուկյանը։ Գործով որպես տուժողի ներկայացուցիչ է ներգրավվել նաև ՀՀ ոստիկանության Երևան քաղաքի ավագ իրավախարհրդատուն՝ Արթուր Առուստամյանը։ Բացի դա՝ ամբաստանյալ Սմբատ Բարսեղյանի վերաբերյալ պաշտպանական ճառը պետք է հրապարակի պաշտպան Մուշեղ Շուշանյանը, որը չի ներկայացել դատական նիստին, քանի որ վիրավորում է ստացել Արցախյան պատերազմում։ 

Պավել Մանուկյանի պաշտպան Զարուհի Փոստանջյանն էլ միջնորդեց՝ ապահովել Մանուկյանի մասնակցությունը դատական նիստերին և փոփոխել նրա նկատմամբ կիրառվող սանկցիայի ժամկետները, վերականգնել նրա մասնակցությունը։ Փոստանջյանի խոսքով՝ դատաքննությունը գտնվում է պաշտպանական ճառի փուլում և անհրաժեշտ է, որ Մանուկյանը ներկա գտնվի նիստին։ Նախագահող դատավոր Մեսրոպ Մակյանն էլ տեղեկացրեց, որ Մանուկյանը մի քանի անգամ է հեռացվել նիստերի դահլիճից՝ դիմակ չկրելու համար և մինչ դատական նիստի մեկնարկը տվյալ հարցով դիմել են նաև Մանուկյանին, վերջինս էլ հայտնել է, որ սուր ինֆարկտ է տարել, իրեն հակացուցված է դիակ կրել, ուստի դատարանը թույլ տվեց Մանուկյանին մասնակցել նիստին։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ, ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։

Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո