Փաստ ինֆո

ՀՀ գլխավոր դատախազությունը «Սիսական» ջոկատի լեգենդար հրամանատար Աշոտ Մինասյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը մերժելու մասին որոշման դեմ վերաքննիչ բողոք է ներկայացրել։ Այս մասին «Փաստինֆո»-ին հայտնեցին ՀՀ դատախազությունից՝ նշելով, որ վերաքննիչ բողոքով պահանջել են կալանավորել հրամանատարին։

Հիշեցնենք, որ Արցախի հողերի մի մասը Ադրբեջանին հանձնելու Փաշինյանի որոշման դեմ Երեւանում սկսված բողոքի ակցիաներին զուգահեռ իշխանություններն անցել են զանգվածային քաղաքական հետապնդումների՝ հարուցվել են քրեական գործեր՝ բողոքի ակցիաներ կազմակերպելու, ապա նաեւ՝ Փաշինյանի ենթադրյալ սպանությունը նախապատրաստելու հատկանիշներով։ Մի քանի տասնյակ ընդդիմադիր եւ հասարակական գործիչ ձերբակալվել է, որոնցից մի մասին նաեւ մեղադրանքներ են առաջադրվել օրենքի խախտմամբ հավաքներ կազմակերպելու ու անցկացնելու, իսկ Արթուր Վանեցյանին, Վահրամ Բաղդասարյանին և Աշոտ Ավագյանին, նույն ջոկատի լեգենդար հրամանատար Աշոտ Մինասյանին նաեւ իշխանության յուրացման, Փաշինյանի ենթադրյալ սպանության նախապատրաստման, ապօրինի զենք զինամթերք պահելու համար ու նրանց կալանավորելու միջնորդություններ ներկայացվել դատարաններ, որոնք մերժվել են։

Դատարանը ոչ միայն իրավաչափ չէր համարել Արթուր Վանեցյանի, Վահրամ Բաղդասարյանի և Աշոտ Ավագյանի ձերբակալությունն ու նրանց արգելանքից ազատելու որոշում կայացրել, այլեւ փաստել, որ կալանավորելու համար հիմքեր չկան՝ բացակայում է հիմնավոր կասկածը։ Դատարանը մերժել է նաև Մինասյանին կալանավորելու վերաբերյալ միջնորդությունը։ Նշենք, որ Արթուր Վանեցյանի, Վահրամ Բաղդասարյանի և Աշոտ Ավագյանի նկատմամբ կալանավորումը որպես խափանման միջոց կիրառելու մասին միջնորդությունը մերժելու որոշումները բողոքարկվել են ավելի վաղ։

Հեղինակ՝ Իզաբել Սահակյան

Աղբյուր` Փաստինֆո