Փաստ ինֆո

ՀՀ սահմանադրական դատարանը՝ նախագահությամբ Արման Դիլանյանի, մերժել է ՀՀ երկրորդ նախագահ Ռոբերտ Քոչարյանի դիմումի հիման վրա գործի քննությունը՝ ՍԴ որոշումների վերաբերյալ պարզաբանում տալու օրենսդրական բացը հակասահմանադրական ճանաչելու վերաբերյալ։ 

Նշենք, որ «Սահմանադրական դատարանի մասին» սահմանադրական օրենքը չի նախատեսում Սահմանադրական դատարանի կողմից իր որոշումները պարզաբանելու հնարավորություն եւ ՍԴ ներկայացված դիմումով ՀՀ երկրորդ նախագահը ՍԴ-ին խնդրել էր նման օրենսդրական բացը համարել հակասահմանադրական։

Դիմումը ՍԴ ներկայացվել էր դեռեւս հունիսի 4-ին՝ գտնելով, որ նման օրենսդրական բացը հակասում է Սահմանադրության 1-ին հոդվածով նախատեսված՝ իրավական պետության սկզբունքին, 167-րդ հոդվածի 1-ին մասին, 61-րդ հոդվածի 1-ին մասին և 63-րդ հոդվածի 1-ին մասին հակասող և անվավեր։

Գործի քննությունը մերժելու մասին Արման Դիլանյանի ստորագրությամբ որոշման մեջ նշվում է, որ դիմող կողմը 2019թ դեկտեմբերի 25-ին Սահմանադրական դատարան էր ներկայացրել նույնաբովանդակ դիմում, որի վերաբերյալ ՍԴ-ն հունվարի 17-ն կայացրել է աշխատակարգային որոշում, որով գործի քննությունը մերժվել է։ Մասնավորապես ՍԴ-ն գտել է, որ ցանկացած դատարան, առավել ևս այն դատարանները, որոնց որոշումները վերջնական են, իրենց որոշումները պետք է շարադրեն այնպես, որ պարզաբանման անհրաժեշտություն չառաջանա, իսկ պարզաբանումը լինի բացառություն կանոնից, իսկ Սահմանադրական դատարանի դեպքում նրա որոշումների պարզաբանման օրենսդրական ամրագրումը պետք է հիմնավորվի ծանրակշիռ փաստարկների վկայակոչմամբ։ Սույն դիմումով դիմող կողմը նշել է, որ հաշվի է առել հունվարի 17-ի աշխատակարգային որոշման պատճառաբանությունները և վերացրել է նույն որոշմամբ մատնանշված թերությունները։ Այլ կերպ ասած՝ նախորդ դիմումի վերաբերյալ ՍԴ-ն որոշում էր կայացրել մերժել քննությունը՝ նշելով, որ ՍԴ-ի կողմից որոշումների պարզաբանում նախատեսված չէ, իսկ դիմող կողմը նոր դիմումով պահանջել էր ճանաչել դա Սահմանադրությանը հակասող։

Աղբյուր` Փաստինֆո