Փաստ ինֆո

Մենք ասել ենք, որ եթե դատաքննության արդյունքում կհաստատվի, որ կա հանցագործություն և կա պատճառված վնաս, ապա այդ վնասը կվերականգնվի, բայց գտնում ենք, որ չկա հանցագործություն։ Այս մասին լրագրողների հետ զրույցի ժամանակ ասաց ՊԵԿ նախկին նախագահ, ՀՀ ֆինանսների նախկին նախարար Գագիկ Խաչատրյանի փաստաբան Երեմ Սարգսյանը։

«Եթե դատարանի օրինական ուժի մեջ մտած վճիռ կլինի, որ մեղավորություն կա և վնաս է պատճառվել, այդ վնասը կվերականգնվի»,-ասաց Երեմ Սարգսյանը։

Հարցին՝ արդյոք Գագիկ Խաչատրյանի խափանման միջոցը փոխվել է ի կատարում ՄԻԵԴ-ի որոշման, Երեմ Սարգսյանը նկատեց՝ միանշանակ չի կարող ասել, թե կոնկրետ որ հանգամանքն է հաշվի առնվել. «Իմ կարծիքով բոլոր հանգամանքները համակցության մեջ են գնահատվել, ադ թվում ՄԻԵԴ-ի որոշումը։ Մի այլ բան է, թե կառավարության ներկայացուցիչներն ինչ են ասում ՄԻԵԴ-ի որոշման վերաբերյալ, բայց այս անգամ ՄԻԵԴ-ի կողմից շատ կոշտ նամակ էր և դա իրենից ենթադրում էր, որ խոշտանգման վարույթ է սկսվում։ Քննության առարկա են դառնալու նաև այն հանգամանքները, որ պետությունը խոչընդոտել է, որ անձն իր իրավունքներն իրացնի։ Կարծում եմ՝ լավ էին հասկանում, որ եթե շարունակեր Գագիկ Խաչատրյանը կալանքի տակ մնալ, ավելի էին ամրապնդվելու խոշտանգման վարույթի հիմքերը։ Կարծում եմ՝ ամբողջ համակցության մեջ է գնահատվել ու որոշումը կայացվել»,-ասաց Երեմ Սարգսյանը։

Աղբյուր` Փաստինֆո