Փաստ ինֆո

ԱԺ ֆինանսավարկային և բյուջետային հանձնաժողովի նիստի ժամանակ քննարվեց «Հաշվեքննիչ պալատի մասին» օրենքում փոփոխություններ անելու մասին նախագիծը։

ԱԺ «Իմ քայլը» խմբակցության պատգամավոր Եղիշե Սողոմոնյանը զեկուցեց նախագիծը և նշեց, որ գործող կարգավորումներով Հաշվեքննիչ պալատի անդամ կարող են հանդիսանալ այն անձինք, որոնք ունեն աուդիտի որակավորում, աուդիտորական գործունեության 5 տարվա փորձ, Հաշվեքննիչ պալատի անդամի երեք տարվա փորձ.

«Ստացվում է եթե անձը մասնավոր հատվածում ֆինանսական հատվածում գործունեություն է ծավալում և ունի բավարար գիտելիքներ, ունի աուդիտի փորձ, չէր կարող առաջադրվել որպես Հաշվեքննիչ պալատի անդամ, բայց մեր ուսումնասիրությունները ցույց տվեցին, որ ճիշտ կլինի՝ հնարավորություն տանք նաև մասնավոր հատվածի լավագույն մասնագետներին ևս դիտարկել որպես հաշվեքննիչ պալատի անդամի թեկնածու՝ հաշվի առնելով այն հանգամանքը, որ ի վերջո մասնագիտական այս հանձնաժողովը թեկնածուին ինքն է ընտրում և հաշվի է առնելու նաև մարդու որակները»,-նշեց Եղիշե Սողոմոնյանը։

Պատգամավորը հավելեց, որ առաջարկում են արձանագրել, որ եթե անձն ունի ֆինանսական համակարգի 10 տարիների փորձ, որից 5 տարվա ղեկավար անձի փորձ և նաև աուդիտի որակավորում, ապա հնաավորություն ունի ներկայացված լինել որպես Հաշվեքննիչ պալատի անդամի թեկնածու։

ԱԺ պատգամավոր Սերգեյ Բագրատյանը նկատեց՝ այս փոփոխությունների իմաստը լավ հիմնավորված չէ.

«Ի՞նչ է նշանակում ֆինանսական ոլորտում նվազագույնը 10 տարվա աշխատաքային ստաժ, որից առնվազն 5 տարին ղեկավարի պաշտոնում։ Այսինքն օրինակ մի ՍՊԸ-ում ձևակերպել են տնտեսագետ, հիմա 10 տարի տնտեսագետ է աշխատել, 5 հոգանոց ՍՊԸ-ում անունը դրել են տնտեսագիտական բաժնի պետ, պետք է համարենք, որ իրավունք ունի Հաշվեքննիչ պալատի անդամ ընտրվի՞։ Դա կլինի պլանկայի լուրջ իջեցում։ Այս փոփոխությունն անտեղի է ու հիմնավորված չէ։ Հաշվեքննիչ պալատը լուրջ կառույց է և չի կարելի ամեն մեկին թույլ տալ մտնել Հաշվեքննիչ պալատ»,-նշեց Սերգեյ Բագրատյանը։

Աղբյուր` Փաստինֆո