Փաստ ինֆո

Բոլոր ակցիաները իշխանությունների համար ահազանգ են, որ նրանք պետք է լքեն իշխանական լծակները և հնարավորություն տան, որ երկրում խորհրդարանական արտահերթ ընտրություններ անցկացվեն, գլխավորը՝ Նիկոլ Փաշինյանը պետք է հրաժարական տա և պատասխանատվություն կրի այն իրավիճակի համար, որը ստեղծվել է երկրում,-այս մասին «Փաստինֆո»-ի հետ զրույցում ասաց «Ռեֆորմիստներ» կուսակցության ղեկավար Վահան Բաբայանը:

Ինչպես տեղեկացրել էինք քաղաքացիները արդեն մի քանի օր է ակցիաներ են իրականացնում «Իմ քայլը» խմբակցության պատգամավորների շենքերում:Մասնակիցների թվում են նաև «Ռեֆորմիստներ» կուսակցության անդամները, որոնցից մի քանիսը երեկ հարձակման էին ենթարկվել «Իմ քայլի» պատգամավոր Կորյուն Մկրտչյանի տան բակում ակցիա իրականացնելիս։

Մեզ հետ զրույցում Վահան Բաբայանը նշեց, որ ոստիկանությունը նյութեր է նախապատրաստում այս առիթով:

Վահան Բաբայանի խոսքով՝ տարբեր կուսակցություններ ակցիաներ են նախաձեռնում, իսկ կոնկրետ երեկ «Իմ քայլը» պատգամավոր Կորյուն Մկրտչյանի տան մոտ ակցիա է իրականացրել «Ռեֆորմիստներ»կուսակցությունը և միջադեպի պահին այնտեղ եղել են իրենց կուսակցության անդամները.

«Մեր գործընկեր քաղաքական կուսակցությունները կոչ արեցին ի աջակցություն հավաքվել նույն բակում և այսօր կրկին ակցիա իրականացվեց»: Նշենք, որ այսօր պատգամավորի տան բակում մեծ թվով ոստիկաններ էին հավաքվել։

Մեր այն հարցին, թե «Ռեֆորմիտները» ինչու չեն միանում 17 կուսակցություններին, եթե պահանջը նույնը, գործողությունների հետ էլ կարծես թե համակարծիք են՝ Վահան Բաբայանը պատասխանեց.

«Մեր կուսակցությունը միացել է 17 կուսակցությունների պահանջին, մենք դեռևս սեպտեմբերի 4-ին եղել ենք առաջին կուսակցությունը, որ փողոցում ակցիա իրականացրեց՝ Նիկոլ հեռացիր կարգախոսով, իսկ ինչ վերաբերվում է գործող ֆորմատի մեջ մենք չենք եղել և այս պահին էլ չկանք:Մեր կուսակցության անդամները մասնակցում են տարբեր ակցիաների հավաքների, բայց մենք 17 կուսակցությունների ձևաչափի կազմակերպչա-իրավական գործընթացում չկանք»:

Քաղաքական գործչի խոսքով ՝ստեղծված իրավիճակում միակ ելքը իրավիճակը լիցքաթափելու և երկիրը բնականոն ընթացքին վերադարձնելու համար՝ խորհրդարանական արտահերթ ընտրությունն է:

«Հայաստանում իրավիճակ է փոխվում ժամերի ընթացքում և երկրում պետք է անցկացվեն արտահերթ ընտրություններ, չի բացառվում նմանատիպ դժգոհությունների առկայության դեպքում՝ ընտրությունները ձևավորվեն նաև Նիկոլ Փաշինայնի հրաժարականից հետո»,-ասաց Բաբայանը:

Ըստ նրա՝ավելի լայն ժողովրդական զանգվածների ներգրավման համար անհրաժեշտ էերկու քայլ՝ պետք է հայտարարվի՝ ով է լինելու Նիկոլ Փաշինյանի այլընտրանքը, երկրորդ՝ պետք է լինի հստակ ճանապարհային քարտեզ ինչպես է երկիրը առաջ շարջվելու:

«Ես գտնում եմ, որ մեր ազգը այդքան աղքատ չէ որ բացի Նիկոլ Փաշինյանից այլ թեկնածու չունենա: Հաջորդ կառավարությունը պետք է լինի համաձայնության կառավարություն և պետք էլինի արհեստավարժ և կարողանա կոնկրետ խնդիրներ լուծել համաձայնության և խաղաղության պայմաններում»,-ասաց Բաբայանը:

Աղբյուր` Փաստինֆո