Փաստ ինֆո

Երբ սկսում ենք մի բան անել և օրակարգը մեծացնում, ուռճացնում ենք, ամեն կոմպոնենտ տուժում է։ Հիմա մենք այս կոմպոնենտի վրա ենք կենտրոնանում։ Լրագրողների հետ զրույցի ժամանակ այս մասին ասաց լրագրող, հաղորդավար Նարեկ Մարգարյանը։

«Անգամ այն հանրահավաքներին, որ գնում են, հարցերի սպեկտրը շատ լայն էր։ Եթե նեղացնենք այդ հարցերի սպեկտրը մի հարցի, որ հրաժարական լինի, կարծում եմ՝ շատ ավելի արդյունավետ կգործեն բոլոր քաղաքական ուժերը և հասարակական շարժումները»,-ասաց Նարեկ Մարգարյանը։

Նա նշեց, որ արվեստագետների մեթոդը երկու կոմպոնենտից է բաղկացած։ Առաջինն այն է, որ մշակութային գործիչներն առձեռն նամակները հանձնում են դեսպանատներ և փորձում հանդիպումներ ունենալ. «Եվ երկրորդը, քանի որ բոլորն ունեն մեծ լսարաններ, կոչով դիմեցին իրենց հետևորդներին, նամակ տարածեցին և խնդրեցինք, որ մարդիկ բոլոր գերատեսչությունների էլեկտրոնային հասցեները լցնեն այդ նամակներով։

Դա իր էֆեկտն ունենում է, մենք հեշտացրեցինք գործը։ Ընդամենը 5 րոպեում կարելի է 20-30 տեղ ուղարկել շատ կարևոր, լավ շարադրված նամակ, որը կազմել էինք Մարդու իրավունքների պաշտպանի գրասենյակի հետ»,-ասաց Նարեկ Մարգարյանը։

Վերջինս նկատեց՝ համացանցում անընդհատ հայտնվում են տեսանյութեր գերիների խոշտանգումների, վատ վերաբերմունքի և վախենում ենք պատկերացնել, թե օբյեկտիվից այն կողմ ինչ է տեղի ունենում.

«Երեկվա երթին հուզիչ մի դեպք եղավ։ Մի աղջիկ էր եկել, ձեռքին նկար էր զինվորի, որը դեռ սովետական համազգեստով էր։ Երբ Հրանտ Թոխատյանը հարցրեց, թե ում նկարն է, աղջիկն ասաց, որ իր եղբայրն է, որը 27 տարի առաջ է գերի ընկել և չի վերադարձել։ Մարդը 27 տարի չի վերադարձել, և մենք ուղղակի իրավունք չունենք դա թույլ տալու»,-ասաց Նարեկ Մարգարյանը։

Աղբյուր` Փաստինֆո