Փաստ ինֆո

Մենք հանդիպեցինք ԱՄՆ դեսպանատան դիվանագիտական կորպուսի ներկայացուցիչների հետ, հանձնեցինք մեր նամակ-խնդրանքը։ Նամակը կփոխանցվի դեսպանին։ Այս մասին քիչ առաջ լրագրողների հետ զրույցում ասաց դերասան Հրանտ Թոխատյանը։

«Ասացին, որ դեսպանի ծանոթանալուց հետո, պատասխանը կուղարկեն մեզ»,-ասաց Հրանտ Թոխատյանը։

Անդրադառնալով հարցին՝ արդյոք արվետսագետների ակցիաներից հետո սոցցանցերում սկսված մտավորականների թիրախավորումն ուղղորդված է, Հրանտ Թոխատյանն ասաց. «Ավելի լավ է այդպես կարծեմ, քան կարծեմ, որ անտարբերություն կա, դրա համար այստեղ հիմա մարդկանց բազմահազարանոց հոսք չկա։ Չգիտեմ՝ ուղղորդում են, թե ոչ, բայց եթե հնարավոր է անգամ այս հարցում ուղղորդել, դա առնվազն պետք է տականքություն լինի։

Այստեղ հավաքված են մարդիկ, որոնք փորձում են վերադարձնել իրենց հարազատներին։ Ի՞նչ ուղղորդվածություն կարող է այս ամեն ինչի մեջ լինել։ Առնվազն այս հարցում չի կարող լինել որևէ ուղղորդվածություն, որովհետև սա հրատապ հարց է, որը բոլորիս է հուզում։ Կա՞ մեկը, որ չմտածի մեր գերիների օր առաջ վերադարձի մասին։ Չեմ հասկանում սրա մեջ ի՞նչ կարելի է երկար փորել, որ ինչ-որ պոզեր կամ պոչեր փնտրել»,-նշեց Հրանտ Թոխատյանը։

Վերջինս նշեց, որ յուրաքանչյուր բանականություն ունեցող մարդուն հուզում է այն հարցը, թե ինչու ստորագրված փաստաթղթում նշված են տարածքները հանձնելու ժամկետները, իսկ գերիներին վերադարձնելու ժամկետները սահմանված չեն. «Ո՞նց կարելի էր ամեն մեր մի սանտիմետրը, մեր հողի կտորը տալ, իսկ մարդկանց, մեր զավակներին, եղբայրներին այդպես թողնել քմահաճույքի հույսին, անհնար մոտեցում է դա»,-ասաց Հրանտ Թոխատյանը։

Հարցին՝ կառավարությանը նույնպես պատրաստվում են նամակ փոխանցել, Հրանտ Թոխատյանն ասաց. «Եթե ես պետք է իմ կառավարությանը դիմեմ խնդրանքով, որ եկեք օգնեք մեր գերիներին վերադարձնենք, այդտեղ նոնսենս կա։ Դա պարտականություն է, իրենց սրտի ուզածն էլ դա պետք է լինի առաջին հերթին»,-նշեց Հրանտ Թոխատյանը։

Նա հավելեց, որ հետագա քայլերի մասին կտեղեկացնեն։

Աղբյուր` Փաստինֆո