Փաստ ինֆո

Մեր գործողությունները, մեր պայքարը այս և մեր ձեռքի տակ եղած մյուս մեթոդներով պայքարը հանուն Հայաստանի ապագայի շարունակվելու է այնքան ժամանակ մինչև վարչապետը հրաժարական տա։ Այս մասին լրագրողների հետ զրույցում ասաց ՀՅԴ երիտասարդական միության անդամ Քրիստինե Վարդանյանը։

«Ակցիայի մի քանի տասնյակ մարդիկ այսօր բերման են ենթարկվել տարբեր ոստիկանական բաժանմունքներ, այժմ էլ այնտեղ են։ Կարծեք վնասվածքներ էլ կան, որովհետև տեսաք՝ ինչպես էին բերման ենթարկվում տրոլեյբուսների վրայից, բերման էին ենթարկվում անհամաչափ ուժի կիրառմամբ, բայց նրանք չեն կարողանալու այդ մեթոդներով լռեցնել մեր արդար զայրույթի ձայնը, դուք չեք կարողանալու շեղել օրակարգը։

Հայրենիք ունեցող քաղաքացիները հայրենիք են կորցրել և նրանց համար կա մեկ գերագույն նպատակ՝ Հայաստանի իշխանություններից հեռացնել դավադիր ուժերին։ Դուք հակասում եք ՀՀ-ում ապրելու մեր երազանքին, ուստի հեռանալու եք և դրա համար անելու ենք մեր ուժերի ներածին չափով ամեն ինչ»,-ասաց Քրիստինե Վարդանյանը՝ ընդգծելով, որ իրենց լռեցնելն անհնար է և կա՛մ պետք է ձերբակալեն և բանտերը լցնեն ամբողջ հայ ժողովրդին, կա՛մ հաշտվեն իրողության հետ և անցնցում հեռանան։

Հարցին՝ պատրաստվու՞մ են գնալ ոստիկանության բաժիններ, որտեղ բերման են ենթարկվել քաղաքացիները, Քրիստինե Վարդանյանը նշեց, որ իրենց ընկերները հոգով պինդ են, գիտեն՝ ինչու են պայքարի դուրս եկել. «Այստեղ գաղափարի մարտիկներ են։ Չեմ կարծում՝ աջակցության կարիք լինի։ Մեր միակ մտահոգությունն է՝ հասկանալ, թե ինչպես կարող ենք անել, որ Նիկոլ Փաշինյանը րոպե առաջ հեռանա»,-ասաց Քրիստինե Վարդանյանը։

Աղբյուր` Փաստինֆո