Փաստ ինֆո

Համբերատար, խելացի, մարդասեր ու շրջապատը լուսավորող Ալենը կյանքի 21 տարիներն ապրեց լիարժեք. ծիծաղելով, ճամփորդելով, անընդմեջ սովորելով, սիրելով ու ստեղծելով բարին, գեղեցիկը։ Փորձեց փոխել աշխարհը և իր ներկայությամբ, խորհուրդներով ու պատմություններով մտերիմների աշխարհն էլ ավելի լավը դարձրեց։

Պատերազմի առաջին զոհերից է Ալենը. Թշնամու անօդաչուն հարվածել էր Մատաղիսի մատույցներում, երբ Ալենը զինակիցների հետ փորձում էր օգնություն հասցնել առաջնագծում կռվող զինծառայողներին։ Հարվածը դիպուկ էր, որի հետևանքով կտրվեց 21-ամյա երիտասարդի կյանքի թելը։
Ալենը գերազանցությամբ սովորել և ավարտել է Մանկավարժական համալսարանի ռեժիսուրայի բաժինը, այնուհետև ընդունվել Բոստոնի համալսարան։ Ուսումնառության չորս տարիների ընթացքում նա հասցրեց ձեռք բերել ընկերներ ու նրանցից յուրաքանչյուրի մեջ «ներարկել» իր լուսավոր գաղափարները։

«Փաստինֆո»-ի հետ զրույցում Ալենի կուրսընկերուհի Էլեն Պողոսյանը նշեց՝ Ալենը բոլորին սովորեցնում էր լինել մարդասեր ու հանդուրժող. «Նրա մոտ դա շատ լավ ստացվեց։ Ալենը սխալ բաներ չէր անում։ Միշտ փորձում էր անել այնպիսի բաներ, որ արդյունքը միայն լավը լինի»։
Ալենի կուրսի ղեկավար Հերբերտ Գասպարյանը պատմում է՝ սովորաբար ուսանողներին սովորեցնում են վարվեցողության կանոններ, բայց Ալենին դա չէր վերաբերում։ Նա հրաշալի գիտեր՝ հարցերին ինչպես պետք է մոտենա։ Ցանկացած հարցի վերաբերյալ ուներ իր սեփական կարծիքը և գիտեր՝ ինչպես այն արտահայտել։

«Հենց սկզբից հասկացա, որ նա շատ տաղանդավոր ուսանող է և նրա հետ խոսում էի կիսատոներով, ոչ այնպես, ինչպես սովորաբար մյուս ուսանողների հետ եմ խոսում։ Ինձ իսկույն թվաց, որ նա շատ բան հասկանում է, շատ բան գիտի և միանգամայն ես ճիշտ էի։ Նա սովորական կուրսային բեմադրություններ չէր անում։ Օրինակ բեմադրեց Դեմիրճյանի «Ավելորդը», բայց «Ավելորդի» մեջ գտավ այն հերոսականությունը, որ պարունակում է այդ գործը»,-նշեց Հերբերտ Գասպարյանը։

Մտերիմները նշում են՝Ալենն ընկերության մեջ կատարելություն էր։ Փորձում էր միշտ լսել, հասկանալ և տեղին խորհուրդներ տալ։ Բոլորին մոտիվացնում էր ապրել՝ սիրելով մարդկանց ու այն, ինչով զբաղվում են։

«Մի օր երբ անտրամադիր էի, եկավ ասաց՝ արի զբոսնենք։ Գնացինք զբոսայգի ու այնտեղ ինձ խնդրեց, որ իր հետ ատրակցիոն նստեմ։ Քանի որ բարձրությունից վախենում եմ, միանգամից հրաժարվեցի այդ գաղափարից։ Շատ էր պնդում, համաձայնվեցի։ Հետո ասաց՝ երբ կառուսելը շատ արագ վերև է բարձրանում ու հետո կտրուկ ներքև իջնում, կյանքիդ րոպեներն աչքիդ առջևով անցնում են ու հասկանում ես, որ ոչ մի բան այդ պահին կարևոր չէ, որովհետև եթե անգամ մի ժեշտի կտոր սխալ թեքվի, կարող ես ուղղակի էլ չլինել»,-հիշեց Ալենի կուրսընկերուհի Էլեն Խաչատրյանը։

Ալենն իր 21 տարիներն ապրեց գրքերով, ֆիլմերով, սիրելի մարդկանցով շրջապատված։ Փորձեց փոխել աշխարհը ոչ թե մարդկանց փոխելով, այլ յուրաքանչյուրի մեջ բացահայտելով լավագույնն ու արժանին։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո