Փաստ ինֆո

«Կամ պետք է ձերբակալեն հարյուր հազարավորներին և շինծու գործերով զսպեն այս պայքարը, այսինքն՝ ամբողջ հայ ժողովրդին, կամ պետք է համակերպվեն, որ իրենց հաշված ժամեր են մնացել»,- երիտասարդների անհնազանդության ակցիայի ժամանակ ասաց ՀՅԴ անդամ Քրիստինե Վարդանյանը և հավելեց, որ ռեժիմը խուճապի մեջ է։

«Վախենում են էդ մարդիկ, կառչած են իրենց աթոռներից, իրենց համար միայն նշանակություն ունի այդ աթոռը։ Եթե իրենք պաշտպանեին հայրենիքը այնպես, ինչպես այդ աթոռը, մենք այս վիճակում չէինք լինի։ Ոստիկանները կատարում են Նիկոլ Փաշինյանի ուղիղ հրահանգը, իսկ նրա կողմից հրահանգված է իր աթոռի համար վտանգ ներկայացնող ցանկացածին հնարավորինս շուտ ու ցանկացած մեթոդով վնասազերծել»։

Վարդանյանը տեղեկացրեց նաև, որ հետևում են այլ ակցիաներին ու հասկացել են, որ քաղաքական պահանջ չունեցողները երթը կարողանում են հասցնել ավարտին, տեղ հասցնել ասելիքը, իսկ իրենք չեն համակերպվում եղելության հետ ու վստահ են, որ Նիկոլ Փաշինյանն է պատասխանատուն ու նրա հեռանալով կարող են փրկության շանս ունենալ։

«Մենք անցնում ենք այս ամենի մեջով, սակայն սա նշանակություն չունի, եթե խոսքը հայրենիքի մասին է՝ պայքարի բոլոր մեթոդները թույլատտրվելի են»։

Վարդանյանը տեղեկացրեց, որ շարժվում են կառավարության շենքի մոտ, այդ ընթացքում կճշտեն ակցիայի մասնակիցներից քանի՞սն են բերման ենթարկվել։

Հիշեցնենք, որ «Նիկոլ դավաճան» կոչով երիտասարդները կրկին Երևանի փողոցներում անհնազանդության ակցիա են իրականացնում։ Նրանք պահանջում են Նիկոլ Փաշինյանի հրաժարականը։

Կենտրոնում մեծ թվով ոստիկանական ուժեր են կուտակվել, բազմաթիվ քաղաքացիների բերման են ենթարկել։ Անհնազանդության ակցիա իրականացնող քաղաքացիները բաժանվել են երկու մասի։

Հավելենք, որ երեկ քաղաքացիները ևս անհնազանդության ակցիա էին անում, նրանք փակել էին Մաշտոցի պողոտան, ոստիկանները, բռնի ուժ կիրառելով, բերման ենթարկեցին ակցիայի մասնակիցներից շատերին։

Աղբյուր` Փաստինֆո