Փաստ ինֆո

«Անդառնալի կորուստներով լի մի իրավիճակում ենք հայտնվել, որը, սակայն, ես անելանելի չէի անվանի: Ելքեր, իհարկե, կան՝ որոշները ցավոտ, որոշները պակաս ցավոտ, չնայած, այսպիսի ելքի մասին այս իշխանություններն ամեն ինչից առաջ արդեն իսկ հայտնել էին, անվանելով դրանք ցավոտ փոխզիջումները, որտեղ ես ինքս այդպես էլ չհասկացա, թե որն էր փոխզիջումը, այն պարզ պատճառով, որ իրականում մեր կողմից միայն զիջումներ եղան՝ չհասկանալով, թե ինչի դիմաց էին դրանք, - ասում է հեքիաթասաց, աստվածաբան Հայկ Կիրակոսյանը՝ «Փաստինֆո»-ի հետ զրույցում վերլուծելով վերջին ամիսներին Հայաստանում և Արցախում տեղի ունեցող զարգացումները,-ելքերը կարող են լինել տարբեր՝ առավել մեծ կորուստներով կամ առավել անցավ ելք, որը պարտադիր կերպով կհանգեցնի որոշակի խաղաղ և ստաբիլ իրավիճակի: Ամեն դեպքում, իհարկե ելքի տարբերակ չի քաղաքական դաշտի այն խայտառակ իրողությունը, որն իբրև թե փորձ է՝ երկիրն այս վիճակից հանելու»։

Հայկ Կիրակոսյանը վստահ է՝ թե´ նախկին, թե ´ ներկա քաղաքական գործիչները լիարժեք կերպով սպառել են իրենց և այստեղ արդեն բոլորովին կարևոր չէ՝ հաջողել են նրանք իրենց ճանապարհը, թե ձախողել այն: Պետությունն այս իրավիճակում կարիք ունի բոլորովին նոր լիդերի, ով իր ուսերին կկարողանա վերցնել այս ծանր բեռը, կլինի ազնիվ առաջին հերթին իր, հետո՝ մնացածի հետ.«Թեև հիմա մեր պետականությունը որոշակիորեն խոցված է և այս ամենից, մեծ իմաստով, անիշխանության հոտ է գալիս, այնուամենայնիվ, մենք հիմա նույն իրավիճակում չենք, ինչ դարասկզբին էր: Հուսանք, որ մոտ ժամանակներս Երրորդ համաշխարհային պատերազմ չենք ունենա, առավել ևս՝ կրոնական ֆորմատի, որովհետև դա, արդեն, որոշակի անդարձելիության կհանգեցնի կյանքը՝ Երկիր մոլորակի վրա: Ինչ վերաբերում է Հայաստանին, ապա, ավելի քան երբևէ, հիմա պետք է գիտակցել արտաքին ուժերի և ուժեղ դաշնակիցների կարևորության մասին: Առաջին հերթին պետք է կայունության բերել երկիրը, իսկ դա կարող է անել մեկը, ով պիտակավորված և կեղտոտված չէ՝ բոլոր տարիներին եղած կեղտություններով և խայտառակություններով: Հետևաբար, ես խոսում եմ նոր առաջնորդի մասին, որը պարտադիր կերպով ոչ կուսակցական է: Նոր առաջնորդ կա, ինչպես արդեն ասացի՝ նա անկուսակցական կլինի: Այս մասին առաջիկայում ես տեղեկություն կտրամադրեմ»:

Հայկ Կիրակոսյանը նկատում է՝ նոր առաջնորդի առաջին օրենսդրական նախաձեռնությունը պետք է լինի մահապատժի վերականգնումը, որն, ի դեպ, օրինակ ԱՄՆ-ի պես դեմոկրատիկ երկրում հանդիսանում է նույն այդ դեմոկրատիայի սյուներից մեկը: Անպատժելիության մթնոլորտը՝ ամեն ինչ անելու, ասելու, հանգիստ խղճով ձախողելու կամ դավաճանելու այս ողջ իրողությունն, ըստ մեր զրուցակցի, ընկած է իրական պատճառների հիմքում: Հայկ Կիրակոսյանն ընդգծում է՝ մենք միշտ թերագնահատել ենք Թուրքիային և Ադրբեջանին, այնինչ, դրանք լրջագույն կառավարման համակարգ ունեցող պետություններ են և որքան , որ մենք մեր դաշնակիցների հետ աշխատելու տեղ ունենք, այնքան մեր թշնամիներից սովորելու բան, ինչի մասին, ըստ վերջինիս, արդեն ամոթ չէ բարձրաձայն խոստովանել:

Հարցին՝ արդյո՞ք Հայաստանում առաջիկայում դեռ սպասվում են ցնցումներ և քաղաքական դաժան հաշվեհարդարներ, Հայկ Կիրակոսյանը պատասխանում է՝ դրանք անպայման կլինեն.«Ես չեմ տեսնում ուժերի, որոնք երկիրը կտանեն ստաբիլացման, որոնք կփորձեն մի պահ մոռանալ միմյանց հանդեպ ունեցած տրամադրվածությունները: Պետք չէ խաբել ժողովրդին, պետք է քաջություն ունենալ ճշմարիտ խոսելու ժողովրդի հետ, ասել նրան իրական վիճակը, որում հայտնվել է մեր երկիրը: Մարդիկ այսօր նույնիսկ չգիտեն, թե ի՞նչ է իրենցի ներկայացնում Հայաստանի իրական քարտեզը: Ինչ- որ գաղտնի, դավադիր թեզեր են շրջանառվում ժողովրդի մեջ: Հրապարակավ դրեք քարտեզը և ասեք մարդկանց ողջ ճշմարտությունը՝ ստեղծված իրավիճակի վերաբերյալ, իսկ քանի դեռ այդ քաջությունը չկա, քաղաքական ցնցումներն և վայրիվերումներն անխուսափելի են լինելու»:

Ինչպե՞ս դուրս գալ խորը անդունդից, որում մենք հայտնվել ենք: Ըստ Հայկ Կիրակոսյանի, տարածքային անվտանգային հարցերը լուծելուց բացի, առաջին լուրջ վտանգը, որ կսպառնա մեր երկրին ռազմական դրության ավարտից հետո, անվերահսկելի չափերի հասնող արտագաղթն է լինելու, ինչը պետք է ցանկացած գնով կանգնեցվի.« Լավ կամ վատ ձևով, բայց հայկականությունը մեզ է փոխանցվել 12 հազար տարի, և մենք չպետք է լինենք այն սերունդը, որ վերջակետ կդնի հայկականությանն, իր մայր հողում, իր պատմական լեռնաշխարհում: Ես հավատում եմ հայտնի ասույթին, թե ամենամութ խավարից հետո գալիս է լույսը:Ես անդառնալի լավատես եմ և հավատում եմ հայ մայրերին, որոնք տվել են՝ Կոմիտաս, Թումանյան, Նժդեհ և այլն»,- ասում է հեքիաթասաց, աստվածաբան Հայկ Կիրակոսյանը:

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո