Փաստ ինֆո

ՀՀ-ում ֆրանսիայի դեսպանության մոտ միաբանության երթի մասնակիցներին հանդիպեց դեսպանատան ներկայացուցիչը։ Հրանտ Թոխատյանը նշեց, որ Ֆրանսիային խնդրանքով դիմում են որպես բարեկամ, որպես Մինսկի խմբի համանախագահող երկիր, որպեսզի կարողնանան աջակցել բանակցություններով՝ հայ ռազմագերիների և անհետ կորածների վերադարձի հարցում։ 

Դեսպանատան ներկայացուցիչը խոստացավ, որ նամակը դեսպանին անպայման կփոխանցեն։

«Մենք բոլոր նամակաների օրինակները հանձնում ենք ՄԻՊ և ՄԻԵԴ-ում ՀՀ ներկայացուցչի գրասենյակ։ Մեր հետագա անելիքները կհամապատասխանեցնենք իրենց հետ։ Հիմա ամեն երեկո կապ ենք հաստատում տարբեր երկրներում գտնվող գործընկերների հետ։ Մեր հայ համայնքը նամակներ է հանձնել Իսպանիայում, ԱՄՆ-ում, Ֆրանսիայում, Լեհաստանում, և այլ երկրների միջազգային կառույցների գրասենյակներ»։

Դերասանը խնդրեց նաև ինդիվիդուալ նամակներ ուղղել, իսկ իշխանություններից նախաձեռնությանը դեռ արձագանք չկա։

«Չեմ կարող գնահատական տալ կառավարության գործողություններին, որոնք մեզ հայտնի չէ, շփում չկա։ Որոշեցինք մեկ նամակ էլ տանել կառավարությանը՝ փորձենք հասկանալ ի՞նչ է արվում, ինչո՞վ կարող ենք օգնել և եթե ինչ-որ բան չի արվում՝ ինչո՞ւ»։

Հրանտ Թոխատյանն ասաց, որ եթե Ադրբեջանը չի կատարում պարտավորությունները, կարելի է պայման դնել՝ չտալ ոչ մի թիզ հող, քանի դեռ չեն վերադարձվել գերիները։ Առաջարկը ներկայացնելու է նաև կառավարությանը։

Հիշեցնենք, որ արվեստագետները Երևանի Շառլ Ազնավուրի անվան հրապարակից քայլերթով գնում են Ֆրանսիայի դեսպանատան մոտ։ Երթի նպատակն է աջակցել զինվորների և զինծառայողների հարազատներին և իրենց ձայնը հասցնել միջազգային բոլոր հեղինակավոր կառույցներին։

Մտավորականները նշում են, որ իրենք քաղաքական պահանջներ չեն ներկայացնում պարզապես, քանի որ ՀՀ-ում իշխանություն չկա, որը կզբաղվի գերիների ու անհետ կորածների հարցերով, իրենք ստիպված դիմում են միջազգային կառույցների, այդ թվում դեսպանատների օգնությանը։ Վաղը երթի մասնակիցները կայցելեն նաև ՀՀ-ում ԱՄՆ դեսպանատուն։

Աղբյուր` Փաստինֆո