Փաստ ինֆո

Ժամկետային զինծառայողների ծնողները կրկին Կառավարության շենքի մոտ են։

Պարբերական հավաքներից ու բողոքներից հետո ծնողներին ընդունել են և կառավարությունում, և պաշտպանության նախարարությունում։

Ծնողները օրեր շարունակ պահանջում էին, որ արձակուրդ տրամադրեն, կամ Հայաստան տեղափոխեն զինծառայող զավակներին։ Խոստացել են, որ զինվորները կստանան հերթական արձակուրդները, սակայն ոչ թե 10, այլ 7 օրով։

«Այս պահին վարչապետի հետ հանդիպման կարիք չունեն, սակայն ամենօրյա ռեժիմով հավաքվում ենք նույն ժամին, նույն վայրում, որպեսզի կորդինացնենք անելիքները»,- ասաց զինվորի մայրը, հավելելով, որ երեխաները պատերազմի արհավիրքով անցել են, հիմա էլ շարունակում են անմարդկային պայմաններում ծառայել, բուժօգնություն չեն ստանում։ Հավաքվածներից հինգ հոգանոց խումբը նաև այցելել է ՄԻՊ գրասենյակ՝ բարձրաձայնելու անհատական խնդիրներ։

«Մեր զինվորները ոչինչից չեն դժգոհում։ Որդիս մեկ շաբաթ առաջ մեկ օրով եկավ ու կրկին հետ գնաց։ Շատերը տեսել են այնտեղ ինչ պայմաններում են տղաները ծառայում։ Այնտեղ արդեն ձյուն է եկել, ցուրտ է, այդ պայմաններում 60 օր մնացել են՝ թաց վերարկուներով, ձյան տակ։ 60 օր կոշիկները չեն հանում, չեն լողանում։ Պատերազմը արհավիրք է ՝ չկա զորամաս, չկա քնելու տեղ, լողանալու տեղ։ Իրենք այդ վիճակում սառը ջրով են լողանում։ Լավագույն դեպքում տեղակայում են մանկապարտեզներում։ Գիտենք, որ Արցախում լուսավորություն չկա»։

Ծնողները նշում են, որ հուզող հարցերին պատասխանել է նախարարը։ Հետագա պահանջներ ձևավորվելու դեպքում կրկին կդիմեն ՊՆ, կառավարության հետ հանդիպման պահանջ չկա։ Նախարարն ասել է, որ գիտեն խնդիրների մասին, ծնողների մտահոգությունները հասկանում են, հիմա էլ խնդրի լուծման վրա են աշխատում։ Նախարարը տեղեկացրել է, որ զինծառայողներին վրաններ են տրամադրել, շուտով մոդուլներ են կառուցվելու, ապա զորամասեր։

Աղբյուր` Փաստինֆո