Փաստ ինֆո

Հաջորդ գլխավոր դատախազը միանշանակ պետք է մտածի, թե գործադիր իշխանության ղեկավարի ո՞ր լիազորությունից է բխում դատական պրոցեսին միջամտությունը։ Այս մասին «Փաստինֆո»-ի հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հովհաննես Խուդոյանը՝ անդրադառնալով Նիկոլ Փաշինյանի գրառմանը, ըստ որի վերջինիս միջնորդությամբ է վերադարձվել Ռոբերտ Քոչարյանի անձնագիրը և, որ իր հորդորներով դատախազն առարկություն չի ներկայացրել։

Մասնագիտական հանրության շրջանում նշված հայտարարությունը քննարկումների առարկա է դարձել, մասնավորապես, մասնագետները գտնում են, որ Փաշինյանի հայտարարության մեջ առկա է առերևույթ արդարադատությանը միջամտելու հանցագործության հատկանիշներ, որի մասին վաղուց էր բարձրաձայնվում, բայց Փաշինյանի գրառումն ինչ-որ չափով նաև «ինքնախոստովանություն» էր։ Նշենք, որ արդարադատության իրականացմանը և քննությանը խոչընդոտելը քրեորեն պատժելի արարքներ են։ ՀՀ քրեական օրենսգրքի 332-րդ հոդվածի համաձայն՝ արդարադատության իրականացմանը խոչընդոտելու նպատակով դատարանի գործունեությանը ցանկացած ձևով միջամտելը պատժվում է տուգանքով` նվազագույն աշխատավարձի չորսհարյուրապատիկից յոթհարյուրապատիկի չափով, կամ ազատազրկմամբ` մեկից հինգ տարի ժամկետով: Նույն հոդվածի երրորդ մասի համաձայն՝ սույն հոդվածի առաջին կամ երկրորդ մասով նախատեսված արարքները, որոնք կատարվել են անձի կողմից իր պաշտոնեական դիրքն օգտագործելով՝ պատժվում է ազատազրկմամբ` երկուսից վեց տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով:

Պաշտպան Հովհաննես Խուդոյանը «Փաստինֆո»-ի հետ զրույցում նշեց, որ քիչ հավանական է համարում, որ այս հարցի պատասխանը հնարավոր կլինի ստանալ գործող գլխավոր դատախազից, սակայն գտնում է, որ հաջորդ գլխավոր դատախազը միանշանակ պետք է մտածի, թե գործադիր իշխանության ղեկավարի ո՞ր լիազորությունից է բխում դատական պրոցեսին միջամտությունը։

«Եթե դա հիվանդ երևակայության արդյունք չէ, քրեաիրավական գնահատականի պետք է արժանանան ինչպես մտքի հեղինակի, այնպես էլ դատախազության ներկայացուցիչների գործողությունները»,- նշեց Խուդոյանը։

Ինչ վերաբերում է դատարանի գործողություններին և դրանց տրվող գնահատականի կարևորությանը, պաշտպանը նախ արձանագրեց, որ ողջամիտ որևէ մեկը կասկածի տակ չի առնի դատարանների նկատմամբ ճնշումների առկայությունը, ապա նշեց, որ դատարանի վերաբերյալ հարցը նախևառաջ դատարանը պետք է գնահատի, քանի որ ցանկացած ինքնաբացարկի հիմք հենց դատարանն է գնահատում։

Ըստ Խուդոյանի՝ պետք է գնահատվեն նաև այն հարցերը, թե ում պատվերներն են մինչ այս կատարվել, ինչ ծանր հետևանքներ են վրա հասել նաև այդ պատվերների կատարման արդյունքում և արդյոք այսպիսի պատվերներ կատարող իրավապահները չեն կիսում պատվիրատուի պատասխանատվությունն ու ճակատագիրը։

Նրա փոխանցմամբ՝ այս պահին դեռևս հանցագործության մասին հաղորդում չի ներկայացվի։

Հեղինակ՝ Իզաբել Սահակյան

Աղբյուր` Փաստինֆո