Փաստ ինֆո

ԱԱԾ-ն իմ ասածները չի որակել զրպարտություն, ասել է՝ դեռ փաստեր չունենք, եթե փաստեր չունեն՝թող հավաքեն:Ես հեռուստատեսությամբ բանավոր ասել եմ,թող իրենք դա ընդունեն որպես հաղորդում և ուսումնասիրեն,-այս մասին «Փաստինֆո»-ի հետ զրույցում ասաց ԱԱԾ նախկին աշխատակից, «Ազգային անվտանգություն» կուսակցության ղեկավար Գառնիկ Իսագուլյանը:

Ինչպես ավելի վաղ հայտնել ենք, Գառնիկ Իսագուլյանն օրեր առաջ տեղի ունեցած ասուլիսում հանդես է եկել մի շարք սենսացիոն հայտարարություններ, որոնցից հատկապես ուշագրավ էր այն, որ 1400 հայկական անձնագիր է բաժանվել հայերեն իմացող ադրբեջանցիների՝ ԱԱԾ նախկին ղեկավար Արգիշտի Քյարամյանի իմացությամբ, որ թշնամին Հադրութ մուտք է գործել թիկունքից, իսկ Շուշիում հայը կրակել է հայի վրա՝ առանց այդ մասին իմանալու։ Այս հայտարարությունների առթիվ ՀՔԾ-ում նյութեր են նախապատրաստվում ու մինչ քննչականը քննություն է տանում՝ ԱԱԾ-ն այսօր հայտարարությամբ հանդես եկավ, թե նման տեղեկություններ ՀՀ ազգային անվտանգության ծառայությունում առկա չեն, իսկ ԱԱԾ մարմինների և պաշտոնատար անձանց վերաբերյալ զրպարտչական բնույթի կեղծ լուրեր տարածելու գործելաոճը շարունակելու դեպքում կնախաձեռնվեն համապատասխան իրավական գործընթացներ:

Մեզ հետ զրույցում Գառնիկ Իսագուլյանը հիշեցրեց, որ Նիկոլ Փաշինյանը հենց այսօր հայտարարություն է արել, որոնք նախկին երկու նախագահներ Ռոբերտ Քոչարյանի և Լևոն Տեր-Պետրոսյանի գրասենյակները հերքել են, բայց նույն ՀՔԾ-ն կամ ԱԱԾ-ն որևէ քայլ չի ձեռնարկել.

«Ես հայտարարել եմ 1400 անձնագրերի մասին, իսկ իրենք գնացե՞լ են անձնագրային կենտրոններ, ստուգե՞լ են այն մարդկանց ցուցակը, ովքեր անձնագրեր են ստացել, մինչև իմ ասուլիսը շատ բաներ է հայտարարել նաև գեներալ-գնդապետ Մովսես Հակոբյանը, ստուգե՞լ են իր ասածները, փոխանակ ուսումնասիրեն այն տեղեկությունները, որոնք մենք ենք հաղորդել, մեզ ասում են՝ ինֆորմացիա եք տալիս»,- ասաց Գառնիկ Իսագուլյանը:

Մեզ հետ զրույցում ԱԱԾ նախկին աշխատակիցը վստահեցրեց՝մարդիկ, որոնք էլի շատ տեղեկություններ ունեն, ասում են՝ քանի Նիկոլի դավաճանական իշխանությունն է, մենք ինչ-որ բան ասելու ցանկություն չունենք.

«Նիկոլը հայտարարեց, որ մարտի 1-ը ամբողջովին բացահայտված է, իրենք ճշտե՞լ են դա, Նիկոլին կանչե՞լ են հարցաքննության»,-ասաց Իսագուլյանը:

Վերջինս նաև հայտնեց,ՀՔԾ-ն գործ է հարուցել ասուլիսի ժամանակ հնչեցրած հայտարարությունների առիթով, սակայն ինքը հրաժարվել է բացատրություն տալ:

Աղբյուր` Փաստինֆո