Փաստ ինֆո

Հայաստանը կապիտուլյացիա ստորագրած երկիր է։ Կապիտուլյացիա նշանակում է՝ հաղթող երկրի ցանկացած պահանջ կատարվելու է։ Վերջապես պետք է հասկանալ այդ իրողությունը և պետք չէ տուրք տալ մանիպուլյացիաների՝ պետական այս կամ այն պաշտոնատար անձանց կողմից արվող։ Ադրբեջանը հիմա թելադրում է պայմաններ, ընդ որում, այդ պայմանների դեմ այս կամ այն ձևով փորձում է կանգնել Ռուսաստանը՝ իր շահերից ելնելով, որը համընկնում է մեր շահերին։ Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը։

Նրա խոսքով՝ կառավարության ղեկավարը ստորագրել է հայտարարություն և, եթե հայտարարության մեջ պարզաբանման խնդիր ունեն, այսինքն փակագծերը բացված չեն, երեք կողմերի համատեղ քննարկումների ընթացքում է բացվելու։

«Դուք տեսե՞լ եք կամ լսե՞լ եք, որ Փաշինյան Նիկոլն ինչ-ինչ հարցով երկու կողմերին դիմի, ասի՝ հայտարարության այս կետը որոշակի հարցեր է պարունակում, որոնց պատասխանները պետք է իմանանք և կան խնդիրներ, որոնք պետք է լուծենք։ Նման հարցում արե՞լ է, մասնավորապես, միջնորդ երկրի նախագահ Վ. Պուտինին։ Եթե ինքը որևէ ձևով չի արձագանքում, նշանակում է, որ Ադրբեջանի ցանկացած քայլ ճիշտ է համարում»,- նշեց Նահապետյանը՝ հավելելով, որ Սոթքի հետ կապված նույն իրավիճակն է։

Նրա խոսքով՝ սկզբնական շրջանում կառավարության մամուլի խոսնակը, որը միակ անձն է, որն իրավունք ունի վարչապետի անունից խոսել, հերքեց այդ տեղեկությունները՝ նշելով, որ Ադրբեջանի ԶՈՒ ներկայացուցիչները չկան հանքում, նույնն էլ ՊՆ ներկայացուցչությունը, իսկ հետո, երբ տեսանյութերը համացանցում հեղեղվում են, ստիպված ՊՆ-ն որոշեց, որ պետք է արձագանքել։

«Սա նշանակում է, որ կամ կառավարության ղեկավարն իր՝ ամբողջ թիմով իրավիճակին չի տիրապետում, կամ չի կարողանում, կամ դավաճանաբար հատուկ է անում։ Ընտրությունը թողնում եմ մասնագետների և ժողովրդի գնահատականին։ Այնուամենայնիվ, անկախ նրանից, թե որն է՝ հետևանքը մեզ համար նույնն է »,- ասաց Նահապետյանը։

Ինչ վերաբերում է հայ-ադրբեջանական սահմանը GPS-ով գծելու մասին հայտարարություններին, Նահապետյանն արձագանքեց՝ ինչպես պատերազմ են վարում, այդպես էլ սահման են գծում, «Գուգլը» մասնավոր ընկերություն է, GPS-ով Թուրքիա և Հայաստան գոյություն չունեն, լավ է, որ Թուրքիայի Գուգլի GPS-ով չեն նայում, այնտեղ ընդհանրապես Հայաստան չկա։

Անդրադառնալով սահմանի երկարացման խնդրին՝ Նահապետյանը նշեց, որ մեր ժողովուրդը, ՀՀ քաղաքացիները կրելու են պարտություն կրած երկրի խարանը։ Բացի դա՝ Ադրբեջանը վաղ թե ուշ ներկայացնելու է փոխհատուցման պահանջ, պարտված երկիրը փոխհատուցում է տալիս և Նահապետյանը չի բացառում, որ Սոթքի հանքը դրա տարրերից մեկն է։

«Նույն Ադրբեջանը հիմնավորելու է, որ 1993թ առ այսօր իր երկրի տարածքի յոթ շրջան, որը մեր գնահատմամբ ազատագրված տարածքներ են, թալանվել է հայկական կողմից՝ տներ, ենթակառուցվածքներ, գործարաններ և այլն և դրա գինը Ադրբեջանի պաշտոնական և ոչ պաշտոնական աղբյուրների փոխանցմամբ կազմում է մոտ 50 մլրդ դոլար։ Քանի որ Հայաստանն ունակ չէ այդ գումարը փակելու, ինչն իրողություն է, ապա Ադրբեջանն ասելու է՝ մենք համաձայն ենք այլ տարածքային զիջումներ այդ գումարի դիմաց, իսկ այդ տարածքային զիջումներն առաջին հերթին Սյունիքն է»,- նշեց Նահապետյանը։

Անդրադառնալով Տավուշի մարզի 7 գյուղերն Ադրբեջանին հանձնելու վերաբերյալ շրջանառվող, թեև մարզպետի կողմից հերքված լուրերին՝ Նահապետյանն արձագանքեց. «Հայկ Չոբանյանը թող հերքի դիմակների բիզնեսի մեջ համատեղ փայ ունենալու վերաբերյալ տեղեկատվությունը, ոչ թե նման բաներ։ Նա ինչպես կարող է հերքել կամ հաստատել մի բան, որը ոչ իր գործառույթների մեջ է մտնում, ոչ էլ իր խելքի բանն է։ Գեղարքունիքի մարզպետն էլ է հերքում, թե Ադրբեջանի ԶՈՒ-ն Սոթքի տարածքում աշխատակիցներին չի հանում, հերքու՞մ էր։

Ո՞վ են նրանք, որ հերքեն կամ հաստատեն։ Փաշինյան Նիկոլն է բերանը ջուր առել և պաս է տալիս իր ենթականերին։ Այնպես ինչպես Լենա Նազարյանն է ստիպված իր չիմացությամբ փորձում հիմնավորել, թե պատերազմն ինչու պարտվեց, ով է մեղավոր, ով մեղավոր չէ։ Սա է այս իշխանության ալֆան և օմեգան և սրա դառը պտուղները մեր ժողովուրդը քաղելու է այնքան ժամանակ, քանի դեռ իրենք որոշում կայացնող կառույցների ղեկավարներ են»։

Ինչ վերաբերում է ԱԳ նորանշանակ նախարարի պնդումներին, թե մենք ձախողում չենք ունեցել դիվանագիտական դաշտում, ձախողումներ եղել են ռազմադաշտում, Նահապետյանն արձագանքեց՝ նշելով. «Այդ հարցն ուղղեք Ալեն Սիմոնյանին և Արարատ Միրզոյանին, հավանաբար միասին համատեղ խոտ են ծխել։ Ես ուրիշ գնահատական չունեմ այդ բիզնեսմեն ԱԳ նախարարի հիմարությունները մեկնաբանելուց»։

Հեղինակ՝ Իզաբել Սահակյան

Աղբյուր` Փաստինֆո