Փաստ ինֆո

Նոյեմբերի 9-ին Փաշինյանի կողմից ստորագրված հայտարարությունից հետո Արցախի տարածքի մոտ 70 տոկոսն անցնում է Ադրբեջանի վերահսկողության ներքո, սակայն տարածքները Ադրբեջանին հանձնելուց բացի այլ կարգավորումներ հայտարարությունում ներառված չեն։ Անհայտ և անորոշ է Ադրբեջանի վերահսկողության ներքո գտնվող տարածքների հանձնման գործընթացը, մասնավորապես, հստակեցված չէ, թե տարածքների որ բնակավայրերն են անցնում Ադրբեջանի վերահսկողության ներքո, առավել անորոշ է հանձնվող տարածքներում բնակվող արցախցիների ճակատագիրը, նրանց սոցիալական և կենսական նշանակություն ունեցող երաշխիքները։ Առկախված է նաև Բերձորի ճակատագիրը։ Նախօրեին հայտարարվել էր Բերձորի բնակիչների տարհանման մասին, քանի որ քաղաքի կարգավիճակը հստակ չէ, այնուհետև հայտարարվեց, թե Բերձորի, Աղավնոյի և Սուսի բնակիչները կարող են վերադառնալ և շարունակել ապրել իրենց տներում։ Քաշաթաղի շրջանի վարչակազմի ղեկավարի պաշտոնակատար Մուշեղ Ալավերդյանը «Փաստինֆո»-ի հետ զրույցում ասաց, տարհանման աշխատանքներ են իրականացվում հյուսիսային հատվածում՝ մինչև նոյեմբերի 30-ը, իսկ որ Բերձորի, Աղավնոյի և Սուսի բնակիչներին հորդորում են մնալ։

«Անվտանգության հավելյալ երաշխիքները հաշվի առնելով՝ նման հորդոր ենք արել բնակչությանը»,- նշեց նա։

Դիտարկմանը, որ արդեն եղել են նախադեպեր, երբ հորդորել են մնալ տարածքում, որից հետո բնակիչներն այդուհանդերձ ստիպված են եղել հեռանալ բնակավայրերից՝ վերցնելով իրենց հետ միայն այն, ինչ հնարավոր էր կարճ ժամկետներում, Ալավերդյանը նշեց, որ կարծում է՝ այդ պարագայում պետք է բանակը բացատրություն տա և այժմ աշխատանքներ են իրականացվում հումանիտար ճգնաժամը հաղթահարելու ուղղությամբ, ինչպես նաև կան այլ հրատապ հարցեր, որոնք լուծելուց հետո բացատրություններ կլինեն։

Ինչ վերաբերում է կառավարության պարզաբանումներին, մեր զրուցակիցը նշեց, որ նման պահանջ չկա և ինքը՝ որպես շրջանի վարչակազմի ղեկավար իր լիազորությունների սահմաններում որոշել է հորդորել բնակիչներին գնալ, քանի որ հարավային տարածքում խնդիր է եղել, հետո՝ հավելյալ երաշխիքներ ստանալով և որոշակի ինֆորմացիա ստանալով, որոշումը փոխել է և հորդորել է մնալ։

Ինչ վերաբերում է հյուսիսային հատվածում բնակիչների տարհանման հետագա բնակության վայրի և այլ հարցերի վերաբերյալ կայացված որոշումներին, Ալավերդյանը նշեց, որ դեռևս նման որոշումներ չկան, աշխատանքներ տարվում են, բայց հստակեցված չէ, տարբեր բնակավայրեր են, տարվեր իրավիճակում, ըստ իրավիճակի փորձում են պատկան մարմինները լուծումներ գտնել։

Աղբյուր` Փաստինֆո