Փաստ ինֆո

Եթե Սոթքի հանքի կեսն անցնում է թշնամու վերահսկողության տակ, նշանակում է՝ արոտավայրերը, վարելահողերն ադրբեջանցիների մշտադիտարկման տակ են լինելու, հետևաբար գյուղացիները չեն կարողանալու հանգիստ իրենց գյուղատնտեսական գործունեությամբ զբաղվել։ «Փաստինֆո»-ի հետ զրույցում այս մասին ասաց ԱԺ «Լուսավոր Հայաստան» խմբակցության պատգամավոր Աննա Կոստանյանը։

Վերջինս երեկ ԱԺ արտահերթ նիստից հետո գնացել էր Սոթք՝ տեղում ծանոթանալու ստեղծված իրավիճակին։ Պատգամավորն այնտեղ սպաների հետ, որոնք ներկայացրել են իրավիճակը. «Ադրբեջանցիների ներկայացրած քարտեզի համաձայն՝ դարպասները պետք է ավելի ներքև, Սոթքի մոտ տեղադրված լինեն, սակայն այս մասին ո՛չ համայնքապետը, ո՛չ էլ տեղի բնակիչներն են իմացել»,-նշեց Աննա Կոստանյանը։

Պատգամավորը նշեց, որ գյուղացիները մտահոգություն ունեն, որ քանի որ արոտավայրերը, հանդերը, վարելահողերն ադրբեջանցիների մշտադիտարկման տակ են լինելու, ինչն ակնհայտորեն կխոչընդոտի նրանց գյուղատնտեսական գործունեությանը. «Վերջին տարիներին մարդիկ այդտեղ շատ ակտիվ գործունեություն են ծավալել։ Նույնիսկ դեպքեր գիտեմ, որ Երևանից են մարդիկ գնացել այնտեղ, տուն կառուցել, որպեսզի գյուղատնտեսությամբ զբաղվեն։ Փաստացի այս տարիների ամբողջ աշխատանքը ջուրն է լցվում»,-ասաց պատգամավորը՝ նկատելով, որ այդ տարածքի բնակիչները չեն պատրաստվում լքել գյուղը, սակայն այս պահին ապահովության երաշխիքներ էլ չկան. «Եթե ադրբեջանցիներն անարգել գալիս, մտնում են, ուրեմն ինչ երաշխիք կա, որ ավելի առաջ չեն գնա։ Հույսս մեր զինվորներն են։ Այն տղաները, որոնք եղել են Օմարում, որոնք Քարվաճառում սահմաններն են պահել և այժմ էլ այնտեղ են»,-նշեց Աննա Կոստանյանը։

Ինչ վերաբերում է հանքի տնօրենի հետ հանդիպմանը, Աննա Կոստանյանը նշեց, որ իր այնտեղ գտնվելու ընթացքում տնօրենը մասնակցում էր բանակցություններին և չի հաջողվել նրա հետ զրուցել. «Ինձ համար այս պահին շատ կարևոր է հասկանալ՝ ինչու մարզպետն այդքան ուշ եկավ։ Այսինքն՝ Գեղարքունիքի մարզպետը, ով առաջինը հենց ինքը պետք է այցելեր, 6-8 ժամ հետո նոր գալիս է այն պարագայում, երբ այդ ընթացքում հազար ու մի բան կարող էր կատարվել։ Բնակիչներն էլ առանց զենքերի են։ Սոթք գյուղի վերջին տնից մինչև դիրքեր ընդամենը 2-4 կմ հեռավորություն է։ Չնայած տղաները վստահեցրեցին, որ մեր դիրքերն ամուր են, բայց խաղաղ բնակչության մասով ոչ մի երաշխիք չկա»,-հավելեց պատգամավորը։

Աղբյուր` Փաստինֆո