Փաստ ինֆո

Պետք է վերահաստատեմ համոզմունքս, այն իրավիճակում, որում ստորագրվել է փաստաթուղթը, այլ տարբերակ չկար, ցանկացած այլ տարբերակ լինելու էր ավելի վատը։ Այլ խնդիր է, թե ինչու և ինչպես հասանք այդ կետին,-այս մասին հեռուստաուղերձում հայտարարեց Նիկոլ Փաշինյանը՝ հավելելով, որ այսօր կան հրատապ հարցեր, որոնցից կարևորագույնը Հայաստանի ներսում և Հայաստանի շուրջ կայունություն ապահովելն է, որի համար անհրաժեշտ քայլերից մեկը, ըստ Փաշինյանի, նոյեմբերի 9-ի համաձայնությունները իրագործելն է.

«Նոյեմբերի 9-ի հայտարարությունը դատափետելը իրենց գործունեության հիմքում դրած քաղաքական ուժերը չեն ասում, առաջարկում են արդյոք հրաժարվել դրանից, եթե այո՝ ինչ սցենար են նկարագրում դրանից հետո և ինչ հետևանքների կբերի այդ սցենարը»,-ասաց Փաշինյանը:

Նրա խոսքով՝ այն ինչ տեղի է ունեցել այս օրերին, դա նոյեմբերի 9-ի հայտարարության իրագործման գործընթաց է, ինչը ենթադրում է, որ Գեղարքունիքի մարզում ՀՀ ԶՈՒ-երը պետք է տեղակայվեն այն սահմանին, որը հայտնի է Խորհրդային Հայաստանի սահմանի տեսքով.

«Այդ սահմանը որոշվում է GPS կոորդինատներով, ինչպես պարզաբանվել է, Սոթքի հանքավայրը կիսով չափ գտնվել է Խորհրդային Հայաստանի, մյուս մասը՝ Խորհրդային Ադրբեջանի տարածքում, սահմանազատումը բարդ գործընթաց է, և պետք է տեղի ունենա ոչ միայն ռուս խաղաղապահների, այլ՝ ադրբեջանի ներկայացուցիչների մասնակցությամբ, ամեն անգամ այս աշխատանքի շուրջ հանրության շրջանում խուճապ ստեղծելը արվում է մի նպատակով՝ նրանք ուզում են պատերազմը տեղափոխել Հայաստան, քանի որ սովոր են արյունով իշխանության գալ և արյունով իշխանություն պահել, բայց մենք սա թույլ չենք տա, ժողովորդը թույլ չի տա»,-ուղերձում նշեց Փաշինյանը՝ հավելելով, որ ՀՀ իրավապահ մարմինները լիարժեք տիրապետում են իրավիճակին և սա թույլ չեն տա:

«Մենք գործադրում ենք բոլոր ջանքերը՝ Հայաստանի և Արցախի շահերը պաշտպանելու համար: Իմիջիայլոց, քաոսի նպատակը տարածվում է այն նպատակով, որպեսզի կառավարությունը հնարավորություն չունենա առավելագույն ջանքեր կենտրոնացնել օրախնդիր հարցեր լուծելու համար»:

Փաշինյանի համոզմամբ փորձ է արվում անջրպետ դնել ժողովրդի և կառավարության միջև, սակայն մինչ օրս չի հաջողվել:

Աղբյուր` Փաստինֆո