Փաստ ինֆո

«Հասկանալի է, որ նույնիսկ ռուս խաղաղապահները չեն կարողանում լիարժեք կերպով վերահսկել հայկական մնացած Արցախի հատվածում ադրբեջանական զինվորականների տեղաշարժերն ու կանխել տեղի հայ բնակչության հանդեպ նրանց կողմից ուժի կիրառման և ծանակելու դեպքերը: Միևնույն ժամանակ պետք է գիտակցենք նաև, որ հայկական վերահսկողության տակ մնացած հատվածում կարգուկանոն ապահովելու խնդիրը վերապահված է ոչ թե խաղաղապահներին, այլ հայ զինվորականներին, ոստիկաններին, ԱԱԾ և ԱԻՆ աշխատակիցներին, - ասում է ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանը «Փաստինֆո»-ի հետ զրույցում անդրադառնալով Արցախի շուրջ ստեղծված իրավիճակին։

«Հասկանում եմ նաև, որ տեղի իշխանական և ուժային կառույցները պատերազմի ընթացքում մեծապես քայքայվել ու կազմալուծվել են: Այդուհանդերձ, հենց այդ կառույցները, դրանց ստորաբաժանումները տեղերում, բնակիչների հետ համատեղ, պետք է ապահովեն բնակավայրերի անվտանգությունն ու տարածքի անձեռնմխելիությունը, անհրաժեշտության դեպքում՝ նաև ուժ կիրառեն»,- ասաց նա:

Վերլուծելով վերջին շաբաթներին Արցախի հայկական վերահսկողության տակ մնացած տարածքներում տեղի ունեցող զարգացումները, արտակարգ և լիազոր դեսպանը նկատում է՝եթե քաղաքական իշխանությունները կորցրել են վերահսկողությունը, ապա զինվորականները դրա իրավունքը չունեն, որքան էլ դա հոգեբանորեն ծանր ու ֆիզիկապես դժվար լինի: Իհարկե, շատ կարևոր է, որ արդյունավետ համագործակցություն հաստատվի ռուսների հետ, սակայն չի կարելի նրանց վրա բարդել հայ բնակչության պաշտպանության ողջ պատասխանատվությունը, կարծում է Արման Մելիքյանը:

Անդրադառնալով հետպատերազմյան Հայաստանում առկա ներքաղաքական վիճակին, Արման Մելիքյանը նկատում է՝ գործող իշխանությունը դեռևս որևէ երաշխիք ապահովելու ունակություն չի դրսևորել, առայժմ միայն խոսքեր ենք լսում. «Ստեղծված իրավիճակում վարչապետ Փաշինյանի և իր քաղաքական թիմի առաջնային պարտականությունն է ներազգային համերաշխության վերականգնման ապահովումը: Առանց դրա ոչ մի կառավարություն չի կարողանալու արդյունավետ գործել: Փաշինյանի գլխավորած քաղաքական թիմի հանդեպ վստահությունը գրեթե զրոյացած է: Այս որակի կառավարման շարունակումը չի հանդուրժվի, իսկ հեղափոխական կամ ուժային ճանապարհով իշխանափոխությունն էլ կարող է վերջնականապես ոչնչացնել մեր պետականությունը»:

Հարցին՝ ինչպե՞ս պետք է վարվել ստեղծված իրավիճակում, Արցախի նախկին Արտաքին գործերի նախարարը նշում է՝ որպես առաջին քայլ, ճիշտ կլինի, որ հենց Փաշինյանն ինքը նախաձեռնի դեռևս քաղաքականապես չեզոք մնացած և հանրության շրջանում վստահություն վայելող տարբեր անհատների հետ խորհրդակցությունների շրջափուլ, որի ընթացքում այս քաղաքական ճգնաժամը հաղթահարելու ճանապարհային քարտեզը ստեղծելու հեռանկար գուցե բացվի: Մի բանում վստահ եմ, ասում է Արման Մելիքյանը, եթե ներազգային համերաշխության վերականգնումը հնարավոր կլինի իրականացնել Փաշինյանի հրաժարականի գնով, ապա այդ հրաժարականը պետք է տեղի ունենա: Բայց այլևս ոչ մի զգացմունքային գործողություն` ամեն բան պետք է արվի սառը բանականությունը գործի դնելով:

Հեղինակ՝ Նվարդ Մանվելյան

Աղբյուր` Փաստինֆո