Փաստ ինֆո

Հոկտեմբերի 10-ից սկսած արդեն գերիների անմարդկային վերաբերմունքի վերաբերյալ փակ զեկույցներ ենք սկսել պատրաստել։ Հիմա 5-րդ զեկույցն է պատրաստման փուլում։ Այս մասին «Գերիներ ու անհայտ կորածներ. Ո՞վ է զբաղվում նրանցով» քննարկման ժամանակ ասաց ԱՀ մարդու իրավունքների պաշտպան Արտակ Բեգլարյանը։

Վերջինս պարզաբանեց, թե ինչու են փակ զեկույցներ պատրաստել, քանի որ այնտեղ կան բավականին շատ դաժան պատկերներ, ինչպես նաև բավական շատ անձնական տվյալներ. «Նախընտրել ենք, որ ավելի թիրախային լինի և հայկական հասարակության մեջ չմտնեն այդ տեսանյութերն ու լուսանկարները, քանի որ ակնհայտորեն ադրբեջանական կողմի այս հանցագործությունները հրապարակայանացնելու նպատակներից մեկն այն է, որ հոգեբանորեն պետք է ճնշի հայկական հասարակությանը, լրացուցիչ տրավմաների ենթարկի առաջնագծում գտնվող զինվորներին։ Այսինքն այդկերպ լրացուցիչ վախեր առաջացնի զինծառայողների և հասարակության մոտ։ Ադրբեջանական կողմը բավականին «արդյունավետ» կերպով դրանից օգտվում է և հնարավորինս փորձում է լայն տարածում ապահովել հայկական լսարաններում, ինչն անընդունելի է և հանցագործություն է»,-նշեց Արտակ Բեգլարյանը։

ԱՀ ՄԻՊ-ը նշեց, որ բավականին շատ ապացույցներ կան պնդելու, որ սա ադրբեջանական պետության վերահսկողության և նույնիսկ կազմակերպման տակ է գտնվում, քանի որ այն էջերը, որոնք հրապարակում են այդպիսի տեսանյութեր, լուսանկարներ, տարբեր ձևերով կապվում են ադրբեջանական պետական մարմինների հետ։

«Բոլորս էլ հասկանում ենք, որ այդ ծավալի նմանատիպ տեսանյութերը հնարավոր չէ բանակից դուրս հանել առանց պետական համապատասխան մարմինների, այդ թվում հատուկ ծառայությունների վերահսկողության և իմացության։ Առ այսօր ԱՀ և ՀՀ ՄԻՊ-երը և մեր աշխատակազմերը հնարավորինս վերլուծում ենք բոլոր տվյալները»,-նշեց Արտակ Բեգլարյանը։

Նա նշեց, որ իրենց վերլուծությունների համաձայն՝ մոտ 50-60 ռազմագերու մասով տվյալ ունեն, որոնցից մոտ 30-ի ինքնությունը կարողացել են պարզել։

Աղբյուր` Փաստինֆո