Փաստ ինֆո

Սոթքի հանքի հետ կապված պայմանագիր կա, կան պարտավորություններ, և այս ամբողջը վտանգվում է, ինչի պատասխանատուն ՀՀ-ն է։ «Փաստինֆո»-ի հետ զրույցում ասաց տնտեսագետ Թաթուլ Մանասերյանը։

Տնտեսական վնասները Թաթուլ Մանասերյանի դիտարկմամբ արդեն բազմաթիվ են։ Տնտեսագետը նկատեց՝ Արցախի հանձնված շրջանների բնեղեն և նյութական կորուստից բացի Արցախում էլ ընտանիքների մեծ մասը վարկեր էին վերցրել՝ կառուցելու կամ վերակառուցելու, տնտեսություն վարելու, հետևաբար այս ամենը հսկայական վնաս կհասցնի և՛ տնտեսությանը, և՛ բանկերին։

Այս պահին դժվար է հաշվարկել տնտեսական այն վնասները, որոնք կկրենք, քանի որ դա կարող են անել միայն ընկերության մասնագետները.

«Ըստ էության ադրբեջանական կողմը կարող է և արդեն մեծ վնաս է հասցնում հանքի շահագործմանը և իրենց բացարձակ չի կարող հետաքրքրել, թե ինչ տնտեսական վնասներ է հասցնում և՛ ներդրողներին, և՛ Հայաստանի տնտեսությանն ու Արցախին»,-նշեց տնտեսագետը՝ հավելելով, որ եթե շահույթ չի ստացվում, շահութահարկ, բնապահպանական և այլ վճարներ նույնպես չեն կատարվում, որը կունենա նաև սոցիալ-տնտեսական հետևանքներ, այդ թվում գործազրկություն, արտահանման կրճատում։

Հարցին՝ հանքի այն հատվածը, որը մեր վերահսկողության տակ է լինելու, որքանով կարող է փրկել իրավիճակը, Թաթուլ Մանասերյանն ընդգծեց՝ հանքը պետք է դիտարկել որպես մի ամբողջություն. «Հիմա ցանկացած ձեռնարկություն, եթե վերցնենք ու մասնատենք, ասենք, որ այս մասը չպետք է աշխատի, իսկ մյուս մասն աշխատում է, չի լինի։ Տեխնոլոգիապես բոլորն իրար հետ փոխկապակցված են, լիարժեք չի կարող գործել, իսկ լիարժեք չգործելու դեպքում կաթվածահար է լինում։ Սա է խնդիրը»,-ասաց տնտեսագետը։

Դիտարկմանը, որ այստեղ գործ ունենք գործարարի շահի պաշտպանված չլինելու հետ, քանի որ հանքի տնօրենը տեղյակ չէր այս ամենին, տնտեսագետն ասաց. «Բնականաբար նա չէր էլ կարող մասնակցել, որովհետև սա ֆորսմաժոր է։Տվյալ պարագայում կարծում եմ՝ շատ յուրահատուկ իրավիճակ է, որ փորձագետի օգնությամբ պետք է գնահատել»,-ամփոփեց Թաթուլ Մանասերյանը։

Աղբյուր` Փաստինֆո