Փաստ ինֆո

Սեպտեմբերի 27-ին Ադրբեջանի կողմից սանձազերծած պատերազմի ընթացքում տեղի ունեցած ողբերգական իրադարձությունները, ինչպես նաև, հետպատերազմյան ժամանակահատվածում առանձին իրավասու պաշտոնատար անձանց հայտարարությունները և բացահայտումները, տեղական և միջազգային ԶԼՄ-ների հրապարակումները վերլուծելով գտնում եմ, որ ՀՀ որոշ բարձրաստիճան պաշտոնատար անձինք ենթադրաբար կատարել են ՀՀ ՔՕ-ով արգելված մի շարք հանցանքներ, այդ թվում՝ պետական դավաճանություն և պետական գաղտնիքի հրապարակում։ Այս մասին հրավիրված մամուլի ասուլիսին ասաց «Մեկ Հայաստան» կուսակցության ղեկավար Արթուր Ղազինյանը՝ ներկայացնելով հանցագործության մասին հաղորդում։

Ղազինյանը հիշեցրեց նոյեմբերի 17-ին ՀՀ ԶՈՒ ԳՇ պետի հայտարարությունն առ այն, որ ԳՇ պետի պաշտոնի նշանակվելուց ընդամենը չորս օր անց ՀՀ վարչապետին, իսկ դրանից մի քանի օր անց ԱԽ-ին ներկայացրել է ռեգիոնում ռազմաքաղաքական իրադրության վերլուծությունը և ՀՀ ԶՈՒ կարողությունը, մասնավորապես, նշել, որ ՀՀ արտաքին անվտանգությանը վտանգ է սպառնում արդեն ոչ միայն Ադրբեջանի, այլև՝ Թուրքիայի կողմից և հայտնել, որ ՀՀ ԶՈՒ կարողությունները չեն կարող դիմակայել այդ հարձակմանը և խնդրել է ձեռնարկել բոլոր միջոցները՝ պատերազմը թույլ չտալու կամ հետաձգելու ուղղությամբ։

Ղազինյանի խոսքով՝ քրեական վարույթն իրականացնող մարմինը պետք է պարզի, թե ինչ գործողություններ է իրականացրել ՀՀ քաղաքական իշխանությունը՝ ՀՀ ԶՈՒ ԳՇ պետի կողմից ներկայացված վտանգը չեզոքացնելու ուղղությամբ, գնահատի՝ արդյոք բավարար են եղել այդ գործողությունները սպասվող պատերազմը կանխելու կամ այն հետաձգելու համար։ Բացի դա՝ Օնիկ Գասպարյանը նաև նշել է, որ պատերազմի չորրորդ օրն արդեն ԱԽ նիստի ժամանակ ներկայացրել է հայկական կողմի կորուստները և ստեղծված իրադրության վերաբերյալ ԶՈՒ գնահատականը՝ շեշտելով, որ երկու-երեք օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար, հակառակ դեպքում ռեսուրսները սեղմ ժամկետներում կսպառվեն և պատերազմի յուրաքանչյուր հաջորդ օրերի իրադարձությունները հանգեցնելու են բանակցային գործընթացների համար ոչ բարենպաստ պայմանների։

Ղազինյանը նաև անդրադարձավ ՌԴ նախագահ Վլադիմիր Պուտինի հայտարարությանը, համաձայն որի, հոկտեմբերի 19-20-ին, երբ ադրբեջանական բանակը գրավել էր ԼՂ բուն տարածքի մի փոքր հատված հարավում՝ ՀՀ վարչապետ Նիկոլ Փաշինյանը հրաժարվել է ընդունել ՌԴ նախագահի առաջարկությունը՝ պատերազմը կանգնեցնելու մասին, ընդ որում, դա համաձայնեցված էր Ադրբեջանի նախագահի հետ։ Ղազինյանը նշեց, որ վարույթն իրականացնող մարմինը պետք է պարզի, թե ՀՀ վարչապետը Պուտինի այդ պահին հայանպաստ առաջարկությունը մերժելուց առաջ որ իրավասու մարմինների հետ է խորհրդակցել, խորհրդակցել է առհասարակ, թե ոչ, տեղյակ է եղել արդյոք ԳՇ պետը Պուտինի այս առաջարկի մասին և ինչ պայմաններում և ինչ պատճառերով է մերժվել ՌԴ նախագահի առաջարկությունը, ինչպես նաև հարկ է պարզել, թե որքան տարածքային և մարդկային կորուստներ են արձանագրվել հոկտեմբերի 19-ից հետո և գտնել ՀՀ բարձրագույն իշխանության ներկայացուցիչների գործողությունների շարժառիթները և դրդապատճառները։ Ղազինյանը նաև հիշեցրեց, որ Շուշիից հեռարձակումներ իրականացնող միջազգային լրագրողները հերքում էին Շուշիի գրավման փաստը և նշում, որ այն պարզապես հանձնվել է Ադրբեջանին, ընդ որում, վարչապետը բազմիցս նշել է, որ Շուշիի անկումը վճռորոշ է եղել՝ ՀՀ և ԱՀ համար անբարենպաստ պայմաններով հայտարարություն ստորագրելու համար։ Ղազինյանը գտնում է, որ վարույթն իրականացնող մարմինը պետք է պարզի, թե ինչ հանգամանքներում է հանձնվել Շուշի քաղաքը, ձեռնարկվել են արդյո՞ք բոլոր անհրաժեշտ միջոցները և քայլերը Շուշի քաղաքի պաշտպանությունը կազմակերպելու համար, մասնակցել են արդյո՞ք ՀՀ և ԱՀ ԶՈՒ ստորաբաժանումները, հնարավոր էր արդյոք խուսափել նոյեմբերի 9-ին՝ Ադրբեջանի դրոշի օրը Շուշի քաղաքն առանց մարտերի հանձնելուց, պետք է պարզել, թե ՀՀ և ԱՀ ռազմաքաղաքական իշխանություներն ինչ քայլեր են ձեռնարկել Շուշի քաղաքի պաշտպանության համար մարտեր մղող կամավորականներին Շուշի քաղաքից անվտանգ դուրս բերելու համար և արդյոք տեղեկացված են եղել Շուշին պաշտպանող մեր հայորդիները՝ Շուշին հանձնելու որոշման մասին, հնարավորություն եղել է արդյոք փրկել մարտեր մղող կամավորականներին։

Ղազինյանը նշեց, որ ՀՀ ղեկավարությունն առերևույթ կատարել է ՀՀ ՔՕ 299-րդ հոդվածի 1-ին մասի և 304-րդ հոդվածի և 306-րդ հոդվածով նախատեսված հանցագործություններ։

Աղբյուր` Փաստինֆո