Փաստ ինֆո

Թերզյան Սայաթը սեպտեմբերի 27-ին պատերազմի լուրը լսելուն պես Ռուսաստանի Դաշնությունից վերադարձավ Հայաստան ու միանգամից մեկնեց Արցախ՝ առաջնագիծ։ Նրա որոշման մասին լսելով ընտանիքը հուզվեց, բայց որդուն հպարտությամբ ճանապարհեց. Սայաթը եկել էր՝ շարունակելու ազատամարտիկ հոր գործը։

«Հադրութ եկանք Գյումրու 30 հոգանոց ջոկատով»,- «Փաստինֆո»-ի հետ զրուցում պատմեց Սայաթը։

26-ամյա կամավորը հիմա հիշում է պատերազմի ամեն դրվագը, հետո լսում հասարակությանը հայտնած տեղեկություններն ու ասում՝ պետք չէր ժողովրդին սխալ տեղեկություն տալ պատերազմի մասին։

«Ձեզ շատ էին սխալ տեղեկություն տալիս։ Ամսի 10-ին, որ մենք էնտեղ էինք, դիվերսանտները շատ էին՝ մինչև 200 հոգի, բայց էստեղ ասում էին ամեն ինչ նորմալ է»։

Հադրութում զինվորները կռվել են անձնվիրաբար՝ Արցախի ամեն սանտիմետր հողում հաղթողը ու կռվողը միայն զինվորն է եղել։ Սայաթն ասում է, որ տղաները առյուծներ էին դարձել մարտի դաշտում։ Իրենց պարտվող չի համարում։ Կռվողները չեն պարտվում. «Ես չեմ համարում, որ պարտվել ենք։ Փոքրաթիվ հայերը, որ կարողացան այդքան զորքերի դեմ կռվել, այդ տեսակի զենքերի դեմ կռվել. Հայ զինվորը չի պարտվել»։

Հիմա, երբ տեսնում է ինչպես են ազատագրված հողերը դատարկվում, բնակիչներն այրում տարիներով կառուցած տները, հավաքում իրերն ու հեռանում անհայտ ուղղությամբ՝ միայն ափսոսանք է զգում։

«Մոնթեն ազատագրեց այդ տարածքները, դա պատմական իրադարձություն է եղել, պատմական իրադարձությունը հանձնեցին»։

Հադրութում կռված կամավորական Սայաթը հրազենային վիրավորում է ստացել ուսից։ Հիմա «Զինվորի տուն» վերականգնողական կենտրոնում բուժում է ստանում։ Այս օրերի ընթացքում, թերապիաների շնորհիվ փոփոխություն է զգում։

«Ձեռքիս մատներս չէի զգում, հիմա քչացել է, ավելի լավ եմ համեմատաբար»։

Կռվի դաշտում էլ, վերականգնողական կենտրոնում էլ, տղաների հետ շփվելիս Սայաթը զգում է, որ ամեն ինչ լավ է լինելու։ Նրանց հետ ամեն շփումը կյանքի հանդեպ պատկերացումները հիմնովին է փոխել։ Սայաթն ասում է՝ չգիտի հետո ինչ է լինելու, բայց կյանքին հասուն աչքերով է սկսել նայել, հակառակորդին չթերագնահատել է սովորել՝ մյուսներին էլ է խորհուրդ տալիս, խորհուրդ է տալիս հարգել զինվորների թափած արյունը, գնալ եռաբլուր, խունկ վառել ու հարգել զոհերի ընտանիքներին։

Աղբյուր` Փաստինֆո