Փաստ ինֆո

Մենք այսօր գտնվում ենք անորոշության և անտեր վիճակում։ Այս մասին ԱԺ արտահերթ նիստի ժամանակ ասաց պատգամավոր Թագուհի Թովմասյանը։

Պատգամավորը հետաքրքրվեց՝ ինչու՞ է հայ քաղաքացին ադրբեջանցի զինվորականի հետ մնացել մեն մենակ. «Ու՞ր է մեր սահմանապահ ծառայությունը, ու՞ր է մեր բանակը, ու՞ր են ի վերջո խաղաղապահները և ու՞ր է պետությունը և ինչու՞ է հայ քաղաքացին ադրբեջանցուն խնդրում, որ իր տնից թողնի իրերը դուրս հանել։ Մենք ո՞ւր ենք հասել, ինչու՞ ենք այսպես խառնվել իրար։ Հասկացանք պարտվել ենք, այդ ամեն ինչը քննարկելու ենք ու դեռ շատ կքննարկենք, բայց հիմա խնդիրներ ունենք, որ չենք լուծում։ Այդ խնդիրները մեզ համար դեռ ավելի հեռուն գնացող ու շատ վատ հետևանքներ են ունենալու»,-ասաց Թագուհի Թովմասյանը։

Վերջինս նկատեց՝ ռազմական դրության պայմաններում չեն պահպանում քաղաքացիների անվտանգությունը. «Ի՞նչն է մեր խնդիրը։ Ինչու՞ ենք մենք կազմաքանդվել, եղած ռեսուրսով ինչու՞ չենք կարողանում մեր քաղաքացիների իրավունքները պաշտպանել, ո՞րն է խնդիրը։ Քիչ առաջ ահազանգեր ստացա։ Հենց այս պահին Քարվաճառի շրջանում խնդիր ունենք։ Երեկ դրված դարպասներն արդեն կոտրվել են ու իրենք առաջ են գալիս։ Քիչ առաջ խոսեցի կորպուսի հրամանատարի հետ, համենայն դեպս այն պահի դրությամբ, երբ ես խոսեցի, հանք ներխուժելու մասով ինֆորմացիան չհաստատվեց, բայց այն, որ դարպասները կոտրվել են ու առաջ են գալիս, դա հաստատվեց և դա խայտառակություն է։ Ես չեմ հասկանում եռակողմ պայմանագրի երկրորդ կամ երրորդ կողմն ուր է։ Եթե հետո պարզվի, հաստատվեն այդ տեղեկությունները, որ ադրբեջանցիները մտել են հանքի տարածք, Սոթքն արդեն Վարդենիսի տարածք է, եթե այնտեղ ներխուժել են, սա լրջագույն խնդիր է»,-ասաց Թագուհի Թովմասյանը։

Մանրամասները՝ տեսանյութում։

Աղբյուր` Փաստինֆո