Փաստ ինֆո

Քաղաքագետ Կարեն Բեքարյանը ՀՔԾ էր հրավիրվել զանգվածային անկարգությունների և ռազմական դրության պայմաններում ցույցեր կազմակերպելու վերաբերյալ քրեական գործի շրջանակներում։ Այս մասին «Փաստինֆո» - ի հետ զրույցում ասաց Բեքարյանի փաստաբան Միքայել Շխիմյանը։

Նա հայտնեց, որ թեև Կարեն Բեքարյանը հրավիրվել է նշված քրեական գործի շրջանակներում, տվյալ գործի վերաբերյալ ընդամենը երկու- երեք հարց է հնչել, ընթացքում բոլորովին այլ բնույթի հարցեր են եղել։

Փաստաբանի փոխանցմամբ՝ հարցերը եղել են մեղադրող ենթատեքստով և, Կարեն Բեքարյանը, իրացնելով Սահմանադրությամբ երաշխավորված իր իրավունքը, այն է՝ իր դեմ ցուցմունք չտալը, հրաժարվել է ցուցմունք տալուց, հարցերին պատասխանելուց։ Իսկ ինչ վերաբերում է զանգվածային անկարգությունների վերաբերյալ քրեական գործի շրջանակներում առաջադրված հարցերին, Բեքարյանը պատասխանել է, որ որևէ առնչություն չունի։

Փաստաբանը նշեց, որ խնդիրն այն է, որ ի սկզբանե Բեքարյանին վկա-֊կասկածյալ կարգավիճակով չեն քննել, նրան հրավիրել էին վկայի կարգավիճակով, իսկ վկան պարտավոր է ցուցմունք տալ և հրաժարվել են հարցերին պատասխանել այն պահից, երբ քննիչը սկսել է հարցեր ուղղել, որոնք հետագայում կարող են օգտագործվել անձի դեմ։

Ավելի վաղ հայտնել ենք, որ ԱԺ աշխատակազմի նախկին ղեկավար Արա Սաղաթելյանը և քաղաքագետ Կարեն Բեքարյանը հրավիրվել են ՀՔԾ՝ հարցաքննության։ Նրանք ՀՔԾ են հրավիրվել Նիկոլ Փաշինյանի կողմից կապիտուլյացիոն ակտի հրապարակմանը հաջորդած զանգվածային անկարգությունների և ռազմական դրության պայմաններում օրենքով սահմանված կարգի խախտմամբ ցույցեր կազմակերպելու վերաբերյալ քրեական գործի շրջանակներում։ Հարցաքննության հրավիրվել են վկայի կարգավիճակով, սակայն հարցաքննություն իրականացվել է կասկածանքի շուրջ։ Արա Սաղաթելյանը և Կարեն Բեքարյանը հրաժարվել են ցուցմունք տալուց՝ օգտվելով իրենց իրացունքներից։

Հեղինակ՝ Իզաբել Սահակյան

Աղբյուր` Փաստինֆո