Փաստ ինֆո

Ունենք խնդիր հանրության մեջ, որովհետև ոչ բոլորն են հասկանում, թե ինչ է տեղի ունեցել և ընկալում են դա այնպես, որ դադարեցվել է պատերազմը։ Ի վերջո մենք ունեցանք անհամաչափ, շատ մեծ կորուստներ։ Մարդիկ չեն մտածում՝ ինչպես եղավ, որ պայթեց պատերազմն այս ձևով, նրանք մտածում են, որ մի քանի հազար երիտասարդ կյանքեր փրկվեցին, բայց փրկվեցի՞ն արդյոք, թե դա հետաձգվեց, որովհետև ոչ Ադրբեջանը, ոչ Թուրքիան չեն թաքցնում իրենց նպատակները։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը, որն այցելել էր կառավարության շենքի մոտ հացադուլ հայտարարած ՀՅԴ անդամ Գեղամ Մանուկյանին և ՍԴ նախկին անդամ Կիմ Բալայանին։

Ալավերդյանը գտնում է, որ հացադուլն ընդունելի է, բայց չեն սպառվել մնացած շտեմարանում եղած բողոքի մեթոդները, մասնավորապես՝ իրավական։ Ալավերդյանը նշեց, որ ինքը ևս հանցագործության մասին հաղորդում է ներկայացրել ՀՀ գլխավոր դատախազություն, թեև գիտի, որ քչերը հույս ունեն, որ այսօրվա դատախազությունը կգործի օրենքի տառի և ոգու համաձայն, այդուհանդերձ անհրաժեշտ է սպառել ներպետական բոլոր ատյանները՝ միջազգային ատյաններին դիմելու համար։

«Արդյո՞ք ժամանակը չէ ստեղծել ժողովրդական, հասարակական, քաղաքացիական տրիբունալ, որը հենց օրերի ընթացքում կկազմավորվի և կհնչեցվեն մեղադրանքները։ Համոզված եմ՝ մեղադրանքների ցուցակի հնչեցումը պակաս արթնացնող ազդեցություն չի ունենա մեր հասարակության վրա»,- ասաց Ալավերդյանը՝ հավելելով, որ իշխանությունը կհասկանա, որ այս բողոքի հետևում ոչ թե զուտ քաղաքական, ինչպես իրենք են պնդում, պայքար է իշխանության համար, այլ՝ կա հանցակազմ՝ առնվազն ՀՀ քրեական օրենսգրքի 28-րդ գլուխն ամբողջությամբ, որը վերաբերում է սահմանադրական կարգի և պետության անվտանգության դեմ ուղղված հանցագործություններին։

Ալավերդյանը գտնում է, որ հասարակությունը պետք է օգտագործի այն մեթոդները, որով հասարակությունը կարող է դիմել ՄԱԿ-ին, այլ միջազգային ատյաններին և նրանք պարտավոր լինեն պատասխանել։

Մանրամասները՝ տեսանյութում

Աղբյուր` Փաստինֆո