Փաստ ինֆո

Ադրբեջանցիներն առաջ են եկել իրենց նախատեսված սահմանից և եկել Սոթքի հանքավայր։ «Փաստինֆո»-ի հետ զրույցում այս մասին ասաց Սոթքի համայնքապետ Հակոբ Ավետյանը։

«Հանքավայրը հենց սահմանն է, իրենք եկել են այդ սահմանի վրա են կանգնել։ Դա արդեն հանքի շահագործման տարածքն է»,-ասաց համայնքապետը։

-         Ինչու՞ են եկել, ի՞նչ են ասում։

-         Դա չգիտեմ, քանի որ այդ ինֆորմացիան դեռ փակ է, մոտավոր բաներ չեմ ուզում ասեմ։

-         Հրապարակումներում նշվում է, որ ադրբեջանցիները եկել ու ասել են, որ դա իրենց տարածքն է։

-         Բնական է՝ իրենք եկել են հենց այդ նպատակով, թե իրենց ինչքանով կհաջողվի, թե մերոնք ոնց կարող են դա բացատրել, հետ ուղարկել, ընթացքում կերևա։

-         Մարզպետի, իրավասու մարմինների, ՊՆ-ի հետ խոսել ե՞ք, իրավիճակի մասին տեղյա՞կ են՝ հաշվի առնելով, որ ՊՆ-ն և վարչապետի խոսնակը հերքել են այդ տեղեկությունը։

-         Ես չգիտեմ, իրենց տեսակետն իրենք կարող են պարզաբանել։ Իրականում ինչ կա, լսել ու տեսել ենք, դրա մասին եմ ես խոսում։ Շատերն են ներկա, ովքեր կարող են այդ հարցին լուծում տալ։ Բնական է, որ շուտով որևէ լուծում կլինի, քննարկումներն անարդյունք չեն լինի։Այս պահին բանակցություններ են ընթանում։

-         Փաստացի հիմա այդտեղ անվտանգության խնդիր կա։

-         Միանշանակ անվտանգ չէ, վտանգը միշտ էլ կա, որովհետև պատերազմական վիճակն էլ չի ավարտվել։ Հակառակորդն ավելի մոտ է գտնվում, պարզ է՝ վտանգավոր է։

-         Ադրբեջանցիները հիմա որտե՞ղ են։

-         Այս պահին կարող է նաև հետ են գնացել, բայց կրակոցներ կամ այլ բան չի եղել։

-         Հանքի աշխատակիցների հետ ամեն ինչ նորմա՞լ է, ինչպե՞ս են։

-         Ոչ մեկի հետ ոչ մի խնդիր չկա։ Ոչ գերի, ոչ կրակոց, ոչինչ չկա։

Հեղինակ՝ Հասմիկ Կոշկարյան

Աղբյուր` Փաստինֆո