Փաստ ինֆո

Նախօրեին ԱԺ խորհրդի նիստում որոշվեց դիմել ՍԴ՝ ԲՀԿ խմբակցության ղեկավար Գագիկ Ծառուկյանին՝ պատգամավորական մանդատից զրկելու համար։ Նիստին ընդդիմությունից մասնակցել են միայն ԲՀԿ խմբակցության պատգամավորները՝ դեմ քվեարկելով, իսկ ԼՀԿ-ն նախընտրել էր չմասնակցել նիստին։ Ինչու՞, այս եւ այլ հարցերի շուրջ «Փաստինֆո»-ն զրուցել է ԼՀԿ խմբակցության պատգամավոր Գեւորգ Գորգիսյանի հետ։

- Պարո՛ն Գորգիսյան, ինչպե՞ս կգնահատեք հետպատերազմյան շրջանում կառավարության իրականացրած քայլերը, որքա՞նով ենք դրանք ուղղված երկրում տիրող ճգնաժամային իրավիճակը բարելավելուն։

-Կառավարությունը առհասարակ իրավիճակին չի տիրապետում, նրանք չեն հասկանում՝ ի՞նչ է կատարվում երկրում, չեն հասկանում այն խնդիրները, որոնց հենց իրենք են հասցրել երկիրը, այնպես են պահում կարծես ոչինչ չի եղել, իրենց պատճառով Արցախը չենք հանձնել:Մենք բազմիցս ասել ենք, այն խնդիրները, որոնք ծառացած են մեր երկրի առաջ, դրա համար պետք է համաժողովրդական համախմբում, պետք է լարվածության թոթափում, իսկ կառավարություն գործողությունները որևէ աղերս չունեն լարվածությունը թեթևացնելու, համերաշխություն հաստատելու և խնդիրներ լուծելու ուղղությամբ

- Երեկ Գագիկ Ծառուկյանին մանդատից զրկելու հարցով ԱԺ խորհրդի նիստ գումարվեց, որին «Լուսավոր Հայաստան» խմբակցությունը չմասնակցեց:Ինչո՞վ էր սա պայմանավորված և որքանո՞վ էր պատեհ այս շրջանում նման հարցի քննարկումը։

-Քանի դեռ վարչապետը խոսում է, որ հիմա պետք է մթնոլորտը մեղմել, չլարել, սակայն անում է քայլեր, որոնք ավելի լարում են մթնոլորտը, այստեղ մենք անելիք չունենք:Երկրի առջև լրջագույն խնդիրներ կան հիմա, այս իրավիճակում ի՞նչ կապ ուներ իրենց այս գործողությունը, սա առկա խնդիրների հետ որևէ տրամաբանություն չուներ։

- Վաղը ԼՀԿ-ի նախաձեռնությամբ ԱԺ արտահերթ նիստ է գումարվելու՝ ռազմական դրությունը վերացնելու օրակարգով:Ի՞նչ սպասումներ ունեք։

-Եթե ռազմական դրությունը հաջողվի հանել հետագա անելիքները կքննարկվեն և գործընթացները կլինեն օրենքի շրջանակներում, չեն լինի սահմանափակումներ, որոնք կան ռազմական դրությամբ պայմանավորված:Այսպես` թե այնպես վարչապետը պետք է հեռանա: Նա կարող է դա անել առանց ցնցումների կամ կարող է երկիրը տանել ցնցումների, հյուծման, ինչը վերջին վատությունը կլինի Հայաստանին Փաշինյանի կողմից։

- Ինչու՞ Լուսավոր Հայաստանը չի միանում 17 կուսակցություններին, որոնք արդեն տևական ժամանակ է հանրահավաքներ են անցկացնում՝ վարչապետի հրաժարականի պահանջով։

-Այն միջոցով, որով Փաշինյանը եկավ իշխանության, դրանով չեմ կարծում կարելի է նրա դեմ պայքարել, որովհետև եթե ժողովուրդը հիասթափված է Փաշինյանից, հիասթափված է նաև այդ մեթոդներից, և չեմ կարծում կարելի է դրանով արդյունքի հասնել, բայց հարգանքով եմ վերաբերում մեր գործընկերների քայլերին:Մենք նշել ենք, որ բոլոր հնարավոր սահմանադրական ճանապարհները կիրառելու ենք Փաշինյանի հրաժարականին հասնելու համար

- Կարծես թե Փաշինյանը հրաժարական տալու մտադրություն չունի։ Ավելին՝ քաղաքական հետապնդումներ են իրականացվում ընդդիմության նկատմամբ. վերջին շրջանում գրեթե ամեն օր բերման են ենթարկվում ընդդիմադիր քաղաքական գործիչներ:

-Դրա համար էլ մենք փորձում ենք հանել ռազմական դրությունը, որպեսզի իշխանությունը իրենց այդ քայլերում որևէ արդարացում չունենա և ընդդիմությանը պատեհ- անպատեհ չհետապնդի, հիմնականում դա իրավաչափ չէ, սակայն ռազմական դրության պայմաններում օրենքով արգելված են ցույցերը, հավաքները, ուստի այս փուլում կարողանում են արդարացնել իրենց գործողությունները, սակայն ռազմական դրությունը հանելուց հետո արդարացում չի ունենա

- Անհետ կորած զինծառայողների, ռազմագերինի հարազատները արդեն տևական ժամանակ է դիմում են տարբեր կառույցներ, սակայն որևէ հստակ պատասխան չեն ստանում, երեկ արդեն դիմեցին ՌԴ նախագահին: Այս ուղղությամբ տարվող աշխատանքները համարու՞մ եք բավարար

-Մենք ամեն օր կապի մեջ ենք անհետ կորած զինծառայողների ծնողների հետ, սակայն որպես ընդդիմություն շատ բան չենք կարող անել, գործադիր մարմինները պետք է դա անեն , սակայն չեն անում:Վարչապետը հանդիպեց նրանց հետ, դա ողջունելի է, սակայն ինչպես տեսնում ենք, որևէ լուծում կամ սպառիչ պատասխան այդ մարդկանց չի տվել:Պետք է դա անեն,այլ ոչ՝ անհասկանալի օրակարգերով իրենց օրը ծանրաբեռնեն և գործունեության իմիտացիա ստեղծեն

Ինչպե՞ս կգնահատեք իշխող «Իմ քայլը» խմբակցության գործողությունները վերջին շրջանում

-«Իմ քայլի» գործողությունները իրականության հետ կապ չունեն, նրանք ինչ-որ օրակարգեր են բերում, գործերով են զբաղված, որոնք բացարձակ կապ չունեն երկրում առկա իրավիճակների հետ, նրանք իրավիճակին այլևս չեն տիրապետում, միակ բանը, որ նրանք տիրապետում են դա իրենց աթոռներն են, դրանից այն կողմ այլ բան չեն տեսնում։

Զրուցեց՝ Քրիստինե Մուշեղյանը

Աղբյուր` Փաստինֆո