Փաստ ինֆո

Եթե երեկվա իմ հացադուլը սկսելուց առաջ, իմ պահանջները ներկայացնելուց առաջ Հանրապետության գլխավոր դատախազը չէր մտածում իրավաչափ գործողություններ կատարել, այսինքն, Նիկոլ Փաշինյանի նկատմամբ քրեական վարույթ հարուցել, նշանակում է, որ ինքը պետք է քրեական պատասխանատվության ենթարկվի՝ անգործության համար։ Այս մասին կառավարության դիմաց լրագրողների հետ զրույցում ասաց ՍԴ նախկին անդամ Կիմ Բալայանը, որը ՀՅԴ անդամ Գեղամ Մանուկյանի հետ միասին հացադուլ է իրականացնում։

Ըստ Բալայանի՝ ստեղծված իրավիճակում ԱԺ-ն նախ և առաջ պետք է պատերազմական դրությունը վերացնի, քանի որ վարչապետի հրաժարական չի կարող պահանջվել առանց ռազմական դրության վերացման։

Ռազմական դրությունը պետք է վերացվի և ընդունվի վարչապետի հրաժարականը, այլ ելք Բալայանը չի տեսնում և կարծում է՝ յուրաքանչյուր մարդ, որն ազգային մի փոքր մտածողություն ունի, այլ ձևով շարժվել չի կարող։

Բացի դա՝ Բալայանը համոզված է, որ նոր բանակցողը կարող է փոփոխություններ մտցնել փաստաթղթում և մտավախություն ունի, որ ստեղծված իրավիճակը նաև այն փոխհարաբերությունների հետևանքն է. որը ստեղծել է Նիկոլ Փաշինյանը՝ այս երկու տարվա մեջ։ Բալայանը պարզաբանեց, որ փաստաթուղթն ամբողջությամբ չեղարկելու մասին հնարավոր չէ այսօր խոսել, որովհետև, թեև հրադադարին կարող են համաձայնել առանց միջազգային պայմանագրի կնքման, միջազգային պայմանագրի մյուս բոլոր կետերը պարտադիր կարգով պետք է միջազգային պայմանագրին համապատասխան վավերացման գործընթաց ունենային։ Բալայանը հիշեցրեց, որ ՌԴ նախագահ Վլադիմիր Պուտինն Արցախ խաղաղապահ զորք ուղարկելու համար մտավ Դումա՝ Արցախ խաղաղապահ զորք ուղարկելու համար օրինական ճանապարհով թույլտվություն վերցնելու, մինչդեռ մեր պետությունում, երբ Սահմանադրության համաձայն պարտավոր էր պարտադիր կարգով ԱԺ-ում քննարկել և համաձայնություն տալ, տեղի չի ունեցել։ Այլ կերպ ասած՝ սահմանադրական կարգի խախտման մի կետ չէ, բազմաթիվ կետեր կան, բոլոր կետերն անխտիր ենթակա էին քննարկման՝ միջազգային պայմանագրի նորմերին համապատասխան։ Բալայանի խոսքով՝ խորը համոզմունք ունի, որ ՍԴ-ն միանշանակ համաձայնություն չէր տա այս պայմանագրին, որը որպես հայտարարություն է ընդունվել, որ գնար խորհրդարան՝ վավերացման, որովհետև, եթե տարածքային խնդիր է քննարկվում, Սահմանադրության համաձայն այդ հարցը պետք է հանրաքվեով լուծվի, ոչ թե՝ ԱԺ-ի կողմից վավերացվի։

Աղբյուր` Փաստինֆո