Փաստ ինֆո

Նոյեմբերի 23-ից ՀՀ վարչապետ Նիկոլ Փաշինյանի հրաժարականի պահանջով անժամկետ հացադուլ իրականացնող Գեղամ Մանուկյանի ինքնազգացողությունը լավ է։ Նա շարունակում է հացադուլը։

Դաշնակցական գործիչը նշեց, որ ոգևորիչ է քաղաքացիների հետ զրույցը. «Ամենաուրախալին այն է, որ երեկ դաշնակցական կամավորներն առաջնագծից նոր վերադարձան, որդիս էլ։ 50 օր չէի տեսել, երեկ տեսա»,-«Փաստինֆո»-ի հետ զրույցում ասաց Գեղամ Մանուկյանը։

Կառավարության շենքի դիմաց հացադուլ իրականացնող Գեղամ Մանուկյանին միանալ ցանկացողներ կան, բայց վերջինս բոլորին խորհուրդ է տալիս մեկ այլ գործով զբաղվել։ Նրան այսօր միացել է նաև ՍԴ նախկին անդամ Կիմ Բալայանը. «Տարիքի, առողջական խնդիր կա, համոզում եմ, որ չմիանա, բայց «չոր կող է»։ Հիմա տեսնեմ՝ կհամոզեմ, թե ոչ»,-ասաց Գեղամ Մանուկյանը․

Դիտարկմանը, որ դեռ որևէ արձագանք չկա նրանց հացադուլին, Գեղամ Մանուկյանը նկատեց՝ արձագանքը շուտով կլինի, և դա վարչապետի հրաժարականի մասին հայտարարությունն է. «Ինքն իրականում հրաժարական տված է։ Միայն այն տեղաշարժի ձևաչափը, որ կա, գաղտագողի, շատ մեծ հսկողության տակ, գրեթե մեկուսացած, վկայում է, որ նա դադարել է ժողովրդային ղեկավար լինել։ Հիշեք 2.5 տարի առաջ կառավարության ամեն նիստից հետո հպարտությամբ քայլելն ու այսօր, վաղ առավոտյան տեսա հսկայական շարասյունը։ Մարդ չի կարող այս ամբողջ ավերից հետո կառավարել։ Երեկ մինչև ուշ գիշեր անհետ կորածների հարազատներն էին հավաքված։ Այդ ամեն ինչը բարոյական բեռ է։

Ո՞նց կարող է մարդ այդ ամեն ինչը տանել»,-նշեց Գեղամ Մանուկյանը։

Աղբյուր` Փաստինֆո