Փաստ ինֆո

Նիկոլ Փաշինյանը նույնիսկ խմբագրի գործունեության մեջ էր սովոր կողքիններին զոհաբերել։ Այս մասին «Փաստինֆո»-ի հետ զրույցում ասաց ՀՅԴ անդամ Գեղամ Մանուկյանը՝ անդրադառնալով նախարարների փոփոխությանը։

«Տարիների ընթացքում նրա պայքարի զինակիցների մեծ մասն այսօր չկան։ Եղածներից մի քանիսը, որ կան խորհրդարանում, նրանք ուղղակի անձնական կախվածության մեջ են։ Պայքարի զինակիցներն անգամ ամենավերջին բառերն են այսօր ասում՝ սկսած Լևոն Տեր-Պետրոսյանից վերջացրած ուրիշներով։ Նախարարների փոփոխությունով չէ։ Զարուհի Բաթոյանը մեղավոր է ուղղակի իր ոլորտը տապալելու համար, բայց Զարուհի Բաթոյանը մեղավոր չէ պատերազմը պարտվելու համար»,-ասաց Գեղամ Մանուկյանը։

Դիտարկմանը, որ նոյեմբերի 23-ին պաշտոնից ազատվեց նաև ԿԳՄՍ նախարար Արայիկ Հարությունյանը այն դեպքում, երբ տևական ժամանակ բարձրաձայնում էին ոլորտային խնդիրներ ու պահանջում նախարարի հրաժարականը, բայց դա եղավ այս ընթացքում, երբ թվում է՝ Արայիկ Հարությունյանը ռազմական գործողությունների հետ կապված մեղավոր չէ, Գեղամ Մանուկյանն ասաց. «Արայիկ Հարությունյանն այդ օրերին Սյունիքում համակարգում էր, չես էլ հասկանում՝ ինչն էր համակարգում։ Երեկ խորհրդանշական մի բան կար. Առաջնագծից վերադարձողները մեկ տարի առաջ Արայիկ Հարությունյանի հրաժարականն էին պահանջում։ Այն ժամանակ պոռոտախոսությամբ էր զբաղվում Արայիկ Հարությունյանը, քրեական գործեր էր խոստանում, անկիրթ էր կոչում այդ երիտասարդներին։ Հետո նրանք պատերազմի առաջին օրը գնացին առաջնագիծ և երեկ երբ վերադարձան Երևան, մեկ տարի առաջվա իրենց նստացույցի շենքն Արայիկ Հարությունյանից մաքրված է, բայց դա արդեն էական չէ»,-ասաց Գեղամ Մանուկյանը՝ հավելելով, որ Արայիկ Հարությունյանը 2.5 տարի իր սև գործն արեց։

«Եթե վարչապետն առավոտյան հայելու մեջ նայի, կհասկանա, որ փոխվելը պետք է սկսի իրենից։ Իրենով է սկսվում և ավարտվում այս ամբողջ փակ շղթան, այս արատավոր կառավարման համակարգը։ Թատրոնն այլևս հանդիսական չունի։ 2.5 տարվա հանդիսականը չկա։ Այդ սուտը, որի մասին շատ ավելի քիչ թվով մարդիկ գիտեին 2.5 տարի առաջ, հիմա բոլորի համար պարզ է։ Ժողովրդի համար սա տրագեդիա է, ոչ թե կոմեդիա»,-նշեց Գեղամ Մանուկյանը։

Աղբյուր` Փաստինֆո