Փաստ ինֆո

«ՔՊ կուսակցությանը հստակ մեսիջ էինք ցանկանում փոխանցել. իրենք պարտավոր են ընտրել, թե իրենց գործողություններով ո՞ւմ շահերն են սպասարկում։ Կամ իրենք շարունակում են աջակցել Նիկոլ Փաշինյանին և դրանով մասնակցում Հայաստանի քանդման դավադիր ծրագրին, կամ կանգնում են հայոց պետականության կողքին և նպաստում Նիկոլ Փաշինյանի օր առաջ հեռանալուն»,- այս մասին «Փաստինֆո»-ի հետ զրույցում ասաց ՀՅԴ երիտմիության անդամ Քրիստինե Վարդանյանը՝ անդրադառնալով «Քաղաքացիական պայմանագիր» կուսակցության մոտ երիտասարդների իրականացրած ակցիային։

Ցուցարարները բերել էին պաստառներ՝ «Ամոթ», «Պարգևավճար», «Ո՞րն է ձեր հայրենիքը» գրություններով, որոնք թողեցին ՔՊ գրասենյակի աստիճաններին:

«Մենք չենք շտապում բոլոր ՔՊ-ի անդամներին նույնականացնել Նիկոլի հետ և մասնակիցը համարել այդ դավադիր ծրագրին, բայց եթե իրենք շարունակեն այսպիսի չեզոք կեցվածք դրսևորել, որևէ կերպ չբարձրաձայնել խնդիրների մասին և չսատարել հանրային պահանջին, արդեն դրան կհետևեն ավելի հստակ և համարժեք գնահատականներ»։

Վարդանյանը տեղեկացրեց նաև, որ այս ընթացքում օգտագործելու են բոլոր օրինական միջոցները, որպեսզի հաղորդագրությունը հասցնեն իրավիճակի պատասխանատուներին և իշխանության ներկայացուցիչների գործողություններն անհանդուրժելի են համարում։ Խոստացավ՝ ամեն ինչ անելու են, որ վարչապետն օր առաջ հրաժարական տա, իսկ բողոքի ակցիաներն ավելանալու են, քանի դեռ դա տեղի չի ունեցել։

«Արայիկ Հարությունյանի հրաժարականի պահանջն առաջինը մենք ենք բարձրացրել՝ պատճառաբանելով բոլոր հիմնային խնդիրները, որոնք կային ոլորտում։ Իրավիճակի առաջնային պատասխանատուն այլ մեկը չէ՝ Նիկոլ Փաշինյանն է։ Որևէ կադրային փոփոխություն, նախարարների փոփոխություն չի կարող իր մեղքի բաժինը քչացնել, որ թողնի, հետագայում շանսերը մեծացնի՝ պաշտոնավարումը հետագայում շարունակելու համար»։

Նիկոլ Փաշինյանի ժամ առաջ հեռանալու կարևորությունը Վարդանյանը մեկնաբանում է նրանով, որ հնարավորինս շանս կունենանք կորցրածը հետ բերելու և շանս կունենանք հնարավորինս արագ վերադառնալու բնականոն հունին։

«Նիկոլ Փաշինյանն ամեն գործիք օգտագործելու է՝ միայն սեփական իշխանությունը ամրապնդելու համար՝ հասարակության որևէ նպաստավոր գործողության մասին խոսք գլնալ չի կարող։ Մեր համար անընդունելի է Նիկոլ Փաշինյանի անգամ օրերի պաշտոնավարման շարունակությունը»։

Քրիստինե Վարդանյանն անընդունելի է համարում, որ վարչապետն իր մեղքը բարդում է թիմակիցների վրա։ Վստահեցրեց՝ իրենց ակցիաները, որոնք հետագայում էլ կազմակերպվելու են ինքնաբուխ կերպով՝ անիմաստ չեն։

«Շարունակելու ենք այն պատճառով, որ ամեն քաղաքացի իր ահնատական պատասխանատվությունը պետք է զգա ու շատ հստակ պիտի լինի՝ որ կողմի շահերն է սպասարկում ու հետագայում պատասխանատվություն է կրելու, կամ պատասխանատվություն կրելո՞ւ է թե ոչ։ Հիմա ուզում ենք, որ յուրաքանչյուրն այդ պատասխանատվությունը զգա՝ առաջին հերթին իշխող թիմը»,- հավելեց Վարդանյանը։

Աղբյուր` Փաստինֆո