Փաստ ինֆո

Պատերազմում անհետ կորած զինվորների հարազատները հավաքվել են ՀՀ-ում ՌԴ դեսպանատան դիմաց։ Նրանցից մեկը լրագրողների հետ զրույցում ասաց, որ անելանելի վիճակում են հայտնվել, արդեն 50 օրից ավել է ոչ մեկը ոչ մի հարցով իրենց խնդրին լուծում չի տալիս, այդ պատճառով էլ այսօր եկել են ՌԴ դեսպանատան մոտ, որ խնդրեն դեսպանին աջակցել իրենց։ Նա նաև դիմեց բոլոր այն մարդկանց, որոնք կարող են օգնել՝ իրենց լծակներով, շրջապատով, օգնեն իրեն։ 

Դառնալով վարչապետի հանդիպմանը՝ նա նշեց, որ այն ոչ թե չի գոհացրել, այլ՝ չի չբավարարել։

«Վարչապետի հետ երկար հարց ու պատասխան չի եղել, ընդամենը մի 40-45 րոպե, որից մի քանի րոպեն վարչապետն իր ներողությունն էր խնդրում բոլորից, դրանից հետո երևի մի քանի հարց է տրվել, որից հետո ինքն ասաց, որ շտապում է կարևոր հանդիպման»,- ասաց նա՝ տեղեկացնելով, որ դրանից հետո բավականին երկար զրույց են ունեցել փոխվարչապետի հետ, շատ հարցեր են բարձրաձայնել։

«Մենք որ ասում էինք՝ վիրավոր տղերք կան կամ շրջափակման մեջ ընկած տղերք կան, իրենց պետք է օգնության հասնել, մարդիկ պատճառաբանում են, ասում են՝ գիտեք ինչ կա, այս պահին այդ տարածքներն Ադրբեջանի վերահսկողության տակ են և չենք կարող այս պահին, բայց անմիջապես այդ պահին ասացի, որ այդպես չէ, եղել է դեպք, որը կապված է հենց ինձ հետ, որ զանգել է ինձ իմ եղբոր տղան՝ ամսի 10-ին, ժամը 05-ի սահմաններում, ասել՝ հոպար, այսպես է իրավիճակը, շրջափակման մեջ ենք, ես երեք րոպե հետո այդ հեռախոսազանգը փոխանցել եմ Գորիսի ՌՈ»,- ասաց նա՝ նշելով, որ այդ տարածքում իսկապես խառնաշփոթ է եղել, հայը հայի վրա է կրակել, չեն իմացել՝ հայը որն է, թուրքը՝ որը, եղել են հայկական համազգեստով հագնված, բայց անգամ երեք րոպե հետո տրված հաղորդումը, որի մասին օպերատիվ բաժինը տեղյակ էր, անգամ այդ դեպքում ոչինչ չեն արել՝ այդ երեխեքին անտառներից հանելու համար։

«Ինչի՞ մասին է խոսքը, որ հիմա Ադրբեջանի տիրապետության տակ է ընկած այդ տարածքները։ Այո, կա, հիմա արդեն նրանց վերահսկողության տակ է, դեռ նախօրեին Կարմիր խաչը պետք է մտներ Հադրութում աշխատեր, բայց Ադրբեջանը թույլ չի տալիս մտնեն»,- նշեց նա՝ հավելելով, որ այդ տարածքում շատ կան և վիրավորներ, և՛ զոհվածներ, այս պատերազմի ընթացքում ամենաշատ զոհերը եղել են Ջաբրայիլի տարածքում։

«Ջաբրայիլի զորամասում ամսի 27-ի դրությամբ եղել է 2100 հոգի զորք։ Պատերազմը սկսելուց առաջ 2100 հոգանոց գունդ է եղել դա, որոնց վրա հարձակվել է ադրբեջանական 2 կորպուս՝ 8-10000 հոգի։ Պատերազմին ներկա մարդը պատմում է՝ հողը ոտներիս տակ դղրդում էր, նայել եմ խրամատներից ՝ 60 հատ տանկ էր գալիս մեր վրա»,- ասաց նա։

Աղբյուր` Փաստինֆո