Փաստ ինֆո

«Այս իշխանությունը չունի որևէ ռեսուրս, կամք ու հնարավորություն, որպեսզի կարողանա ստեղծված իրավիճակից մեզ դուրս բերել: Ես ՀՀ-ում չեմ պատկերացնում մեկ այլ իշխանություն, որը կարող էր ավելի վատը լինել, քան սրանք են: Սա է պատճառը, որ այս իշխանությունը չունի որևէ այլ տարբերակ, քան անհապաղ և անցնցում հեռանալն է, ինչի համար առաջին հերթին պետք է բարոյական քայլ կատարել, ինչից, սակայն, սրանք, ցավոք սրտի լիովին զուրկ են,- «Փաստինֆո»-ի հեր զրույցում ասում է պատերազմական ողջ ընթացքն Արցախում անցկացրած ռազմական վերլուծաբան Տիգրան Աբրահամյանը, վերլուծելով հետպատերազմական իրավիճակն Արցախում և Հայաստանի Հանրապետությունում, ինչպես նաև հնարավոր անվտանգային սպառնալիքները։ Նրա արձանագրմամբ՝ ստեղծված իրավիճակում կարևորագույն խնդիրներից մեկը մնում է Արցախի կարգավիճակի հարցը, որովհետև սա անվտանգային ռիսկեր է առաջացնում պայմանավորված նրանով, որ շարունակում է մնալ անորոշ: Անվտանգային ռիսկերը կտրուկ մեծացել են այն պարագայում, երբ Արցախն իր տարածքների մի հսկայական հատված կորցրել է: Սա բացի տարածքային կորուստ լինելուց, անվտանգային մեծ խնդիրներ է առաջացրել ոչ միայն Արցախի հայկական հատվածի վերահսկողության տակ գտնվող տարածքների վրա, այլ նաև Հայաստանի Հանրապետության համար՝ կլինի Սյունիքը կամ որևէ այլ հատված»: 

Ռազմական փորձագետն ընդգծում է՝ պայմանավորված հետպատերազմական իրավիճակով Արցախում անվտանգության հետ կապված հարցերն այս պահին ամբողջությամբ կարգավորվում են Ռուսաստանի Դաշնության խաղաղապահ ուժերի հետ միասին. «ՀՀ իշխանություններն այլևս որևէ ձևաչափի մեջ կենսունակ և գործուն չեն: Ըստ էության, նրանք դուրս են մնացել քաղաքական գործընթացներից, ինչը մեզ համար՝ որպես պետություն լրացուցիչ բարդ խնդիրների առաջ է կանգնեցնում: Չկա վստահություն ներսում, չկա նաև Հայաստանի և այս իշխանությունների նկատմամբ վստահություն միջազգային գործընկերների կողմից: Նրանք ամբողջությամբ հեղինակազրկված են և այսպիսի իրավիճակում մեծ թվով խնդիրների լուծման միակ ճանապարհն, ինչպես արդեն ասացի, այս իշխանությունների արագ և անցնում հեռացումն է, ինչը հնարավորություն կտա իշխանության գալ մարդկանց, ովքեր իրականում կկարողանան ստեղծված իրավիճակում բարդ խնդիրներ լուծել: Այս իշխանությունն արեց իր առավելագույնը, ինչը, ինչպես տեսանք, ողբերգական հետևանքներ ունեցավ երկու պետությունների՝ Արցախի և Հայաստանի համար»:

Անդրադառնալով վերջին օրերին հասարակության մեջ լուրջ դժգոհությունների ալիք բարձրացրած՝ գերիների և անհետ կորածների վերաբերյալ աշխատանքներին, ռազմական փորձագետ Տիգրան Աբրահամյանը նկատում է՝ այդ աշխատանքները պետք էր ավելի վաղ սկսել.«Գերիների և անհետ կորածների վերաբերյալ պրոցեսը բավականին ուշ է սկսվել, իսկ առկա տեղեկատվությունն էլ ցույց է տալիս, որ այդ պրոցեսն այս պահին էլ բավականին դանդաղ է ընթանում: Առհասարակ, պետական կառավարման համակարգը պարալիզացված է, ինչը ոչ միայն այս, այլ մնացյալ բոլոր ուղղություններով մեզ որևէ հնարավորություն չի տալիս էֆեկտիվ գործունեություն ծավալելու:

Հարցին՝ ի վերջո, ստեղծված իրավիճակում ի՞նչր քայլեր պետք է անհապաղ կերպով իրականացվեն, հնարավոր անդառնալի կորուստներից խուսափելու համար, ռազմական փորձագետն ընդգծում է՝ արդեն նշեցի՝ պահի ամենագլխավոր խնդիրն ու հրամայականն այս իշխանությունների արագ հեռացումն է. «Այս իշխանությունները կարողացել են, բայց չեն կանխել պատերազմը, ինչի մասին մենք վերջերս Ռուսաստանի Դաշնության նախագահի և Արտաքին գործոց նախարարի հնչեցրած հայտարարություններից իմացանք, որ այդպիսի հնարավորություններ եղել են՝ պատերազմի ընթացքի տարբեր փուլերում կանգնեցնել այն, զերծ մնալով մեծ թվով զոհերից, ես կասեի՝ մի քանի հազար զոհերից և տարածքային այսօրինակ կորուստներից: Փաստորեն, սրանք որևէ քայլ չեն ձեռնարկել այս ուղղությամբ: Իհարկե, ժամանակի ընթացքում նրանք պետք է պատասխան տան, թե ինչո՞ւ այդ քայլերը չեն ձեռնարկվել՝ մեզ համար ավելի բարենպաստ պայմաններով պատերազմը դադարեցնելու, ինչի արդյունքում մենք հանգեցինք այս ողբերգական իրականությանը: ՀՀ-ում օր առաջ իշխանության պետք է գան այն ուժերը, որոնք առաջին հերթին կարող են էֆեկտիվ աշխատանք ծավալել Ռուսաստանի Դաշնության հետ, որովհետև ստեղծված իրավիճակով պայմանավորված, տարածաշրջանում կտրուկ մեծացել է ՌԴ-ի դերակատարումը, իսկ Արցախում այսօր մեր հայրենակիցների փաստացի անվտանգությունը հենց Ռուսաստանի Դաշնությունն է իրականացնում: Պետք է կարողանալ համադրել մեր ջանքերն ու պետական շահը Ռուսաստանի Դաշնության հետ, որպեսզի կարողանանք ստեղծված իրավիճակում բանակցության կամ մեկ այլ միջոցով մեզ համար շահեկան լուծումների հասնել»,- եզրափակում է զրույցը ռազմական փորձագետ Տիգրան Աբրահամյանը:

Աղբյուր` Փաստինֆո