Փաստ ինֆո

Կոռուպցիայի կանխարգելման հանձնաժողովի նախագահին հարց եմ տալիս, թե որտեղ է երևում, որ Գագիկ Ծառուկյանը բիզնեսով է զբաղվել, գնումնե՞ր է արել, հաստիքացուցա՞կ է հաստատել, ապրանքների իրացման պայմանագրե՞ր է կնքել, բայց ոչ մի հարցի պատասխան չտվեց։ ԱԺ խորհրդի նիստից հետո լրագրողների հետ զրույցի ժամանակ ասաց «Բարգավաճ Հայաստան» խմբակցության պատգամավոր Միքայել Մելքումյանը։

«Վերցրել են կամայական մի դրվագ, որ իբր թե մասնակցել է բաժնետերերի որևէ ժողովի, որը եղել է արդեն Սեդրակ Առուստամյանի կալանավորման ընթացքում՝ անհնարինության պատճառով։ Մարդու գույքը դրված է կառավարման, կառավարիչը չկա, կալանավորված է, ինքը մասնակցել է և բացահայտված չէ՝ ինքը որպես ի՞նչ է մասնակցել։ Որևէ մեկը վկայություն է տվե՞լ, թե որպես ինչ է մասնակցել։ Տարրական գիտելիքների բացակայության պարագայում, երբ ասում ենք՝ որն է ձեռնարկատիրական գործունեությունը և դրա պատասխանը չկա, սա աբսուրդի թատրոնից է»,-նշեց Միքայել Մելքումյանը։

Հարցին՝ եթե Գագիկ Ծառուկյանը մանդատից զրկվի, ի՞նչ է փոխելու դա, Միքայել Մելքումյանը նշեց. «Սա ցույց է տալիս ամենամեծ փոքրոգության մասին, որ հիմնական քաղաքական ուժի ղեկավարին անօրինական գնաս ու ասես՝ զբաղվել ես բիզնեսով, մանդատը պետք է դնես առանց որևէ ապացույցի։ Սա խայտառակ փոքրոգություն է։ Սույն տիկին չգիտի, թե ինչ բան է ձեռնարկատիրական գործունեությունը։ Եթե դու չգիտես, ո՞նց ես ապացուցում, որ մարդը զբաղվել է»,-ասաց Միքայել Մելքումյանը՝ նշելով, որ սա ցույց է տալիս, թե իշխանությունն ինչով է զբաղված. «Ո՛չ մարդկային է, ո՛չ իրավական է, ո՛չ տնտեսագիտական է, ո՛չ պետական է, ո՛չ ազգային է, ոչ մի հիմք չունի մարդկային ողջամիտ տրամաբանության շրջանակներում, դրա համար էլ երկիրն այս օրին է»,-ասաց Միքայել Մելքումյանը։

Հիշեցնենք՝ ԱԺ խորհրդի այսօրվա նիստում որոշում է կայացվել դիմել ՍԴ՝ Գագիկ Ծառուկյանին մանդատից զրկելու համար։ Որոշման նախագծին կողմ է քվեարկել «Իմ քայլը» խմբակցության 10 պատգամավոր, ԲՀԿ-ի 4 պատգամավորները դեմ են քվեարկել, իսկ ԼՀԿ-ն դի մասնակցել նիստին։

Աղբյուր` Փաստինֆո