Փաստ ինֆո

Ամռանը, երբ կորոնավիրուսով վարակման դեպքերը սկսեցին նվազել, ասել էի, որ հոկտեմբերին աճ է լինելու և եթե դիմակ կրելուց բացի որևէ այլ քայլ չձեռնարկվի, ապա վիճակն ավելի ծանր է լինելու։ «Փաստինֆո»-ի հետ զրույցում ասաց համաճարակաբան Էդուարդ Հովհաննիսյանը՝ անդրադառնալով երկրում առկա համաճարակաբանական վիճակին։

Փորձագետը տրամաբանական է համարում պատերազմին զուգահեռ կորոնավիրուսով վարակակիրների թվի աճը, սակայն որքանով է պատերազմը նպաստել համավարակի տարածմանը, հայտնի չէ։ Էդուարդ Հովհաննիսյանի կարծիքով մոտ 30 տոկոսով պատերազմական իրավիճակն ուժեղացրել է համավարակի ընթացքը. «Հիմնական պատճառն այն է, որ մենք մնացել ենք միայն անձնական պաշտպանության մակարդակի վրա, դիմակ, սոցիալական հեռավորություն։ Մինչդեռ պետք է կոնտակտավորների լայնածավալ հետազոտություն լինի, մեծ, կոմպլեքս միջոցառումներ։ Բազմաթիվ հարցեր կային, որ պետությունը պետք է կարգավորեր ու չի արել, դրա համար այսպիսի ընթացք ունենք»,-ասաց համաճարակաբանը։

Վերջինս նկատեց, որ կոնտակտավորների վերահսկում չի իրականացվել և նրանց չեն վերահսկել, որ տանը մնան, մեկուսանան։ Համաճարակաբանի կարծիքով՝ պետք է կամավորներ հավաքագրեին, որ այդ մարդկանց խանութից անհրաժեշտ իրեր, մթերք տանեին. «Այսօր նման թվեր չէինք ունենա։ Մարդիկ կվարակվեին, բայց գոնե հիվանդանոցում կբուժվեին, կգնային տուն։ Հիմա մեզ մոտ սարսափելի մահացություն է, որովհետև մարդիկ տունը նստած են ծայրահեղ ծանր վիճակում»,-նշեց Էդուարդ Հովհաննիսյանը։

Նա նշեց, որ եթե այդ գործողություններն իրականացվեին, ապա վարակվածների այս քանակը կունենայինք ոչ թե մեկ, այլ երեք ամսվա մեջ,ինչի արդյունքում համաճարակի ընթացքն այսքան բուռն չէր լինի։

Անդրադառնալով վարակվածների շրջանում բժիշկների թվին՝ համաճարակաբանն ասաց, որ նրանց մեծ մասն ամռանն է վարակվել։ Բժիշկների հիմնական խնդիրն այս դեպքում գերհոգնածությունն է. «Մարդիկ երբ գերհոգնած են լինում, պաշտպանման զգոնությունը պակասում է և վարակվում են։ Իմ կարծիքով՝ նաև առաջին էտապում շատ շահագործեցին բժիշկներին։ Շատ ծանր պայմաններում էին աշխատում, ոչ թողնում էին տուն գնալ, ոչ թողնում էին արձակուրդ վերցնել։ Հիմա միգուցե կա նաև կադրերի պակաս, որ մարդիկ չեն ուզում կորոնավիրուսային հիվանդանոցներում աշխատել, որովհետև տեսան վերաբերմունքը։ Ամեն դեպքում բժիշկների պակասը չէ ինչքան կազմակերպչականը»,-ասաց Էդուարդ Հովհաննիսյանը։

Հարցին՝ հնարավո՞ր է այդ կազմակերպչական բացն առողջապահական կոլապսի հանգեցնի, Էդուարդ Հովհաննիսյանն ասաց, որ երբ ճգնաժամը զարգանում է, ինչ-որ էտապի անցնում է անկառավարելի ճգնաժամի։ Հիմա, թե որ էտապն է մեզ մոտ, համաճարակաբանը չի կարող ասել, քանի որ չի կարող վստահել այն թվերին, որ տալիս է Առողջապահության նախարարությունը։

«Մենք կոմպլեքսային կառավարում չենք իրականացնում։ Կոմպլեքսային կառավարման մեջ նաև մտնում է ռազվետկա կոչվածը։ Այսինքն` պետք է հետազոտեն և իմանան, թե բնակչության որ տոկոսն է արդեն վարակված։ Պետք է հակամարմինների հետազոտություն իրականացվի բնակչության շրջանում, որպեսզի հասկանալի դառնա՝ բնակչության որ մասն է վարակվել, որ մասը դեռ կարող է վարակվել։ Ոչ մեկ այդ հետազոտությունը չի անում։ Նստած ենք սպասում ենք՝ համաճարակն ինչ կանի մեզ հետ։ Երբևիցե ակտիվ չենք հակազդել այս համաճարակին, ակտիվ դիրքում մենք չենք եղել։ Պասիվ դիրքում ենք եղել՝ ինչ կլինի, կլինի»,-հավելեց համաճարակաբանը։

Նշենք, որ ամբողջ աշխարհում կորոնավիրուսով վարակվածների թիվը հատել է 59 միլիոնը։ Վիրուսից մահացել է 1 մլն 395 838 մարդ, ապաքինվել՝ 40 մլն 890 266 մարդ։ Հայաստանում հաստատվել է կորոնավիրուսային հիվանդության ընդհանուր 126709 դեպք, որոնցից 95099-ը՝ առողջացած, 1976-ը՝ մահվան ելքով։

Աղբյուր` Փաստինֆո