Փաստ ինֆո

Հոկտեմբերի 5-ից եղբորս երեխայից լուր չունենք, տարբեր ճանապարհներով փնտրել ենք երեխային, հինգ անգամ գնացել ենք Արցախ, մինչև առաջնագիծ հասել ենք, փորձել ենք բոլորի հետ զրուցել, տեղեկություններ ունենալ, բայց ոչ մի արդյունք չենք ստացել։ Փորձել ենք տարբեր բարձրաստիճան պաշտոնյաներին, թե ՊՆ նախարարին, թե փոխնախարարին, թե մյուս պատասխանատուներին պատմել մեր խնդիրները, ներկայացրել ենք ու ոչ մեկը չի փորձել օգնել։ Այս մասին «Փաստինֆո»-ի հետ զրույցում ասաց անհետ կորած զինվորներից մեկի հորեղբայրը։

Նրա խոսքով՝ մոտ 2500 երեխա կա անհետ կորած, դեռ չեն լսել, որ մի երեխա գտնվի այդ 2500 երեխայից։
Մեր զրուցակիցը պատմում է, որ իր եղբորորդին ծառայում էր Ջաբրայիլում, ընդամենը 11 օրվա ծառայող երեխային տարել են առաջնագիծ և հենց պատերազմական թեժ գոտում է գտնվել։

«Իրավունք չունեն 11 օրվա ծառայող զինվորին տանել առաջնագիծ։ Տարել են օգոստոսի 30-ին՝ կիրակի օրով, ոչ պաշտոնապես, չգիտեմ ինչ հավաք արեցին, ոնց արեցին ու տարան երեխաներին, երեխան գտնվում էր բժշկական զննության մեջ»,- պատմում է զինծառայողի հորեղբայրը՝ նշելով, որ հանձնաժողովը չորս անգամ որոշել է, որ եղբորորդին ծառայության համար պիտանի չի եղել, բուժզննում էր անցնում և պետք է հաջորդ հավաքին գնար,կոնկրետ պահանջ է դրվել՝ կամ պետք է դատվի, կամ ծառայի։

Մանրամասները՝ տեսանյութում։

Աղբյուր` Փաստինֆո