Փաստ ինֆո

Հայկական ճարտարապետությունն ուսումնասիրող հիմնադրամի համակարգող, ճարտարապետ Րաֆֆի Քորթոշյանը երեկ տարբեր լրատվական կայքերում և սոցցանցերում հայտնված՝ թշնամուն հանձնվելիք գյուղերի շարքում՝ Քարվաճառի շրջանի հատվածում նշված Չարեքտար գյուղի հետ կապված իր զարմանքն ու զայրույթն է հայտնում՝ նշելով, որ «աղբյուրը անհայտ այս ցուցակում տեղ գտած Չարեքտար գյուղն, ըստ սովետական ռազմական քարտեզի՝ գտնվում է ԼՂԻՄ-ի սահմաններից ներս, իսկ սահմանը անցնում է գյուղի արևմուտքից, հարավարևմուտքից և հարավից»:

ՈՒշագրավ է, որ «անհայտ աղբյուրից» որակվող ցանկի հեղինակը Հայաստանի կառավարությունն է, այսինքն, Փաշինյանը, որն Արցախի շրջանները, քաղաքներն ու շեները գրչի մի հարվածով նվիրել է ադրբեջանին՝ ՀՀ կառավարության կայքում էլ հպարտորեն տեղադրել տվել իր հեղինակած՝ դավաճանական և ստորացուցիչ համաձայնագիրի արդյունք-ցանկը՝ որպես հավերժական խարան ՀՀ կառավարության համար։ «Փաստորեն, ՀՀ կառավարությունը չգիտի՞, որ Չարեքտարը Քարվաճառ չի, իսկ Արցախի կառավարությունը, նա էլ չգիտի՞»՝ կրկին զարմանում է Քորթոշյանը։
Ընդ որում, այդ ամոթալի ցանկում ընդգրկված գյուղերը երբ դիտարկում ես, ակնհայտ է դառնում, որ ադրբեջանը պետության ղեկավար հորջորջվող անտեղյակից պոկել է բոլոր այն գյուղերը, որտեղ ստրատեգիական կարևոր նշանակության օբյեկտներ կան։ Իրականում Փաշինյանը գտածո է Ալիևի և ադրբեջանի համար և սրանք աշխատել են նրա օրոք հնարավորինս քամել մեզնից այն ամենը, ինչ կարող են՝ դեռ մի բան էլ ավելի։
Իսկ Հայաստա՞նը․․․ Հայաստանը ներկայացնող անձի համար մի գյուղ էս կողմ, մի գյուղ էն կողմ, արդեն նշանակություն էլ չի ունեցել, պատմությունից, աշխարհագրությունից, Արցախի ջրային քարտեզից ու Հայաստանի ու Արցախի, հայության համար ստրատեգիական, անվտանգային նշանակության օբյեկտներից գաղափար չունեցող այս մարդն իր բկին կանգնած Արցախը վերջապես հանձնել ու ինքն իրեն ազատագրված է համարել։ Այսինքն՝ ինձանից հետո՝ թեկուզ ջրհեղեղ․․․

Այս ամենից հետո՝ ճիշտն այն կլիներ՝ ինքն էլ հանձնվեր ադրբեջանին՝ Հայաստանն ու հայությանն ազատագրելով իրենից։
Քանզի օր առաջ Փաշինյանի թողած ավգյան ախոռները մաքրելն ու փսորված պետությունն ամբողջացնելը գերխնդիր է։ 

Հեղինակ՝ Ա․Ե․

Աղբյուր` Փաստինֆո