Փաստ ինֆո

Իշխանությունը այս տարիների ընթացքում իր անհաջողություններում փորձել է որևէ մեկին մեղադրել, սկզբում դրանք նախկիններն էին, հիմա նաև ժողովուրդն է: Նույնիսկ մինչև պատերազմը ժողովրդին մեղադրում էին, որ չի ուզում աշխատել, ասում էին՝ խնդիրը ժողովրդի ուղեղում է,- «Փաստինֆո»-ի հետ զրույցում ասում է քաղտեխնոլոգ Վիգեն Հակոբյանը՝ ավելացնելով, որ «այս ծանր պարտության և կրած կորուստների համար էլ այս անգամ իշխանությունը փորձում է մեղավոր նշանակել ժողովրդին»։

«Սա ուղղված է ժողովրդի այն խավին, որը շատ դեպքերում էլեմենտար տրամաբանությունից զուրկ է դարձել, որոնց հենց իշխանավորները «զոմբի» կամ «Պողոս» են անվանում: Ի՞նչպես կարող է պարտության համար ժողովուրդը մեղավոր լինել, այն դեպքում, երբ շատ վկաներ, այդ թվում փորձառու գեներալներ, վստահեցնում են, որ կառավարական համակարգում պատերազմի ժամանակ, հավանաբար նաև պատերազմից առաջ, շիլաշփոթ է եղել, ով պատահի ցանկացել է կառավարել բանակը,որևէ համակարգ չի եղել ո՛չ բանակի, ո՛չ թիկունքի կառավարման գործում, սրանք կասկած են հարուցում արդյո՞ք հատուկ միտում չի եղել»,-մեզ հետ զրույցում նման կարծիք հայտնեց Վիգեն Հակոբյանը՝ ընդգծելով, որ սրանք հստակ հիմք են տալիս իրավապահ համակարգերին, որպեսզի գործընթացներ սկսեն:

Նրա հավաստմամբ՝ իշխանությունը երկար ժամանակ ժողովրդի մի հատված էր փորձում ձևավորել, որը պատրաստ կլինի ցանկացած պարտություն ընդունել ընդամենը ի գիտություն և կընդունի այն, ինչ իշխանությունը հրամցնի.

«Հիմա ասում են փրկեցինք կյանքեր, ժողովրդի այդ հատվածը դա ընդունում է իրողություն:Երբ նմանատիպ մեծ օպերացիաներ են պատրաստում պետք է ստեղծեն նաև համապատասխան ֆոն, որը կոչվում է իշխանության ժողովուրդ:Ժողովրդի այս հատվածը կարծում է, եթե այս ամենը իրենց ուղղակիորեն չի կպնում, ապա դա իրենց չի վերաբերում, բայց եթե մենք նայենք արտարժույթի կուրսը, ապա կհասկանանք, որ իրավիճակը ֆինանսական և տնտեսական շուկայում վերահսկողությունից դուրս է, ինչն էլ դա անմիջականորեն ազդելու է իշխանության ժողովրդի վրա, և գուցե այդ ժամանակ դուրս գան փողոց»,-ասաց Վիգեն Հակոբյանը:

Քաղաքական վերլուծաբաննների կողմից գնահատականներ են հնչում, որ արձանագրվել է պատմության մեջ աննախադեպ երեւույթ՝ առանց պատերազմի տրվել է շատ ավելի տարածք, քան հակառակորդը գրավել է ռազմական գործողությունների արդյունքում,

«Պատմության մեջ բացառիկ արդյունք է, չգտա երկրորդը, ուղղակի չկա, գոյություն չունի։ Մենք առանց կռվի հանձնում ենք 4564 քառակուսի կիլոմետր, երբ 44 օր տևած պատերազմի արդյունքում թշնամին գրավել է 3716 քառակուսի կիլոմետր», - հայտարարել է քաղաքական վերլուծաբան Վարդան Բալյանը։ Ինչու եւ ինչպես է դա հնարավոր դարձել «Փաստինֆո»-ի հարցին անդրադառնալով քաղտեխնոլոգն արձանագրեց. «Նրանք, ովքեր պարտադրել են վարչապետին կապիտուլյացիա ստորագրել, ցանկանալու են ստանալ առավելագույնը, ինչ կարող են:Իմ կարծիքով՝ Նիկոլ Փաշինյանը խուճապի մեջ ստորագրել է ցանկացած բան, ինչ իրեն դեմ են տվել: Այս փաստաթղթում կան կետեր, որոնք պատերազմի հետ անմիջական կապ չունեն, օրինակ՝ Սյունիքի միջանցքը, որով Թուրքիան Նախիջևանով կապվելու է Ադրբեջանին, սա կապ չուներ պատերազմական գործողությունների հետ:Նիկոլ Փաշինյանը համաձայնել է ամեն ինչ ստորագրել, միայն իր իշխանությունը պահպանի և ժամանակ ունենա իր անվտանգության հարցերի շուրջ բանակցություններ վարել թե՛ արտաքին, թե՛ ներքին խաղացողների հետ»,-ասաց Վիգեն Հակոբյանը:

Քաղաքագետը կարծում է, որ Փաշինյանը ամեն ինչ անում է, որպեսզի պատմության մեջ իր արարքը չգնահատվի որպես դավաճանություն, այլ ընդամենը ոչ պիտանի պետական գործչի արարք, որը շատ ծանր է նստել պետության և ժողովրդի համար.

«Պատերազմի սկզբում կոմպետենտ գեներալները զգուշացրել են՝ պետք է նվազագույն կորուստներով դուրս գալ իրավիճակից, սակայն ինքը, չգիտես ինչ հաշվարկներից ելնելով, շարունակել է պատերազմը, և արդյունքում եղել է այն , ինչ ունենք»:

Մեզ հետ զրույցում Վիգեն Հակոբյանը վստահեցրեց,որ այս իրավիճակում արտահերթ ընտրություններն անխուսափելի են, իսկ Ռուսաստանը Փաշինյանին չի թողնի հեռանա, մինչև ստորագրած փաստաթղթի վերջին կետը չկատարի.

«Փաստաթղթի կետերը կատարելուց հետո Փաշինյանի պիտանելիությունը աշխարհաքաղաքական ցանկացած կենտրոնի համար զրոյական է լինելու»,-եզրափակեց քաղտեխնոլոգը:

Աղբյուր` Փաստինֆո