Փաստ ինֆո

Փորձել են ազդել Զինված ուժերի, զինվորների արժեհամակարգի վրա և ամեն ինչ արվել է՝ ծրագրավորված դավաճանություն իրականացնելու համար,- «Փաստինֆո»-ի հետ զրույցում հայտարարել է ԱԺ ԲՀԿ խմբակցության պատգամավոր Նաիրա Զոհրաբյանը՝ անդրադառնալով զինված ուժերին, վարկաբեկող քաղաքական իշխանության հայտարարություններին։ Հիշեցնենք, որ այս պատերազմական գործողությունների ընթացքում արձանագրվեց աննախադեպ երեւույթ, երբ քաղաքական իշխանությունները սկսեցին խուճապ առաջացնող տեղեկություններ տարածել առ այն, որ զինվորները դիմում են փախուստի, պահեստազորայինները չեն ուզում ծառայել, իսկ վարչապետ Փաշինյանն էլ ուղղակի «անթասիբ» որակեց Հայաստանում ապրող հայությանը։

«Երբ կազմաքանդեցին դպրոցներում ռազմագիտություն առարկան, երբ տարբեր սորոսական տականքներ ասում էին ՝ մեզ կանոնավոր բանակ պետք չի, երբ Սորոսի գրասենյակների միջոցով քարոզում էին հակապետականություն, թուրքի և ադրբեջանցու հետ խաղաղասիրություն, հակառուսականություն և ասում, թե ռուսն է մեր թշնամին, երբ բանակում դաշտային ճաշարանները վերացրեցին և «Արտ լանչ»-ի կլուբնիկի վրա նստացրեցին բանակը, գնացին դրա կողքը սելֆիներ արեցին։ Երբ նրանց ասվում էր, որ այդ ՍՈւ-երը 130 մլն դոլարով որ գնեցին՝ զինագլխիկներ չունեն և մարտի համար պիտանի չեն, ասեցին՝ բերեք, ոչինչ, միայն նրա համար, որ այդ ՍՈՒ-երի կողքը ընտանեկան սելֆիներ անեն։ Այդ ամենը արվեց մեկ բանի համար, որ բանակը կազմաքանդեն և բանակը պատերազմին պատրաստ չէր 2,5 տարի նման հետևողական բարոյալքումից և կազմաքանդումից հետո»,- ասաց պատգամավորն ու ավելացրեց. «եթե հասարակության մեջ կա մի հատված, որ շարունակում է ասել, թե Նիկոլ Փաշինյանն ինչ արել է՝ լավ է արել, և սատարում է Փաշինյանին, ես այդ հատվածին համարում եմ հանցակից 5000 և ավել զոհերի համար, համարում եմ հանցակից մեր կորսված տարածքների համար»։

Իսկ նման իրավիճակից Նաիրա Զոհրաբյանը մեկ լուծում է տեսնում՝ «դավաճանը պետք է հեռանա իշխանությունից, մենք պետք է ունենանք նոր իշխանություն, նոր բանակցող։ Մենք պետք է սկսենք այդ համակարգը զրոյից վերականգնել՝ ավերից հետո»,- ասաց Նաիրա Զոհրաբյանը։

Աղբյուր` Փաստինֆո